Moskwanyň we Russiýanyň Patriarhy Kirill Serdar Berdimuhamedowy Türkmenistanyň Prezidenti wezipesine saýlanmagy bilen gutlady. Bu barada patriarchia.ru web saýtynda habar berilýär.
«Siz öz zehiniňizi we başarnygyňyzy türkmen halkynyň asuda, erkana durmuşda ýaşamagyna bagyşladyňyz. Dürli möhüm wezipelerde zähmet çeken wagtyňyz hem öz tejribäňizi artdyrdyňyz, munuň bolsa döwleti dolandyrmakda size ýardam berjekdigine ynanýaryn.
Size berk jan saglygyny, jogapkärli döwlet Baştutany wezipäňizde öňde goýan maksatlaryňyza ýetmekde uly üstünlikleri arzuw edýärin» diýip, Patriarh Kirill gutlagynda belläp geçýär.
Belläp geçsek, 12-nji martda Türkmenistanda möhletinden öň Prezident saýlawlary geçirildi. Onuň netijesinde Türkmenistanyň Saýlaw kodeksiniň 76-njy maddasyna laýyklykda, saýlawlarda ses bermäge gatnaşan saýlawçylaryň sesleriniň 72,97 göterimini alan dalaşgär Türkmenistanyň Ministrler Kabinetiniň Başlygynyň orunbasary Berdimuhamedow Serdar Gurbangulyýewiç Türkmenistanyň saýlanylan Prezidenti diýlip ykrar edildi.
