Şu gün Türkmenistanyň Prezidenti Ministrler Kabinetiniň nobatdaky mejlisini geçirdi. Onuň barşynda wise-premýer Serdar Berdimuhamedow Türkmenistanyň Prezidentiniň 17-nji dekabrda geçirilen Hökümet mejlisinde beren tabşyryklarynyň ýerine ýetirilişi barada hasabat berdi.
Türkmenistanyň Prezidenti hasabaty diňläp, wise-premýer Ç.Gylyjowa ýüzlenip, 25-nji dekabrdan başlap, geljek ýylyň 1-nji ýanwaryna çenli bazarlarda we dükanlarda senagat hem-de azyk harytlarynyň baýramçylyk satuwyny guramaga ygtyýar berýändigini aýtdy. Adamlar dogan-garyndaşlary we ýakynlary üçin sowgatlary alar ýaly hem-de Täze ýyl baýramyny gowy geçirer ýaly, käbir harytlaryň bahasyny 50 göterime çenli arzanladyp biljekdigini duýdurdy. Şunuň bilen baglylykda, döwlet Baştutany wise-premýer Ç.Gylyjowa berlen tabşyryklary ýerine ýetirmäge şu günden – 24-nji dekabrdan başlap girişmegi tabşyrdy. “Watan” habarlar gepleşiginde habar berlişi ýaly, hormatly Prezident wise-premýer M.Mämmedowa ýüzlenip, metbugatda we tele-radio ýaýlymlarynda bu çäräni hem-de arzanladylan bahadan satylýan harytlary gowy edip mahabatlandyrmagy tabşyrdy.
