Ýaňy-ýakynda Maýa Kulyýewa adyndaky Türkmen milli konserwatoriýasy “Arkadag Serdarly bagtyýar ýaşlar ýyly” mynasybetli “Sazyň nazaryýeti” kafedrasynyň hepdeliginiň çäginde “XX-XXI asyrlaryň sungatyndaky esasy ösüş ugurlary: täze usullaryň gözlegi” atly ylmy-amaly maslahat geçirdi. Maslahatyň esasy tematiki ugurlary indikilerden ybarat boldy: XX-XXI asyrlaryň sungatynda stiller we akymlar; häzirkizaman ýazuw tehnikalary we tehnologiýalary; XX-XXI asyrlaryň türkmen sungat ussatlary we olaryň häzirkizaman milli sungatyndaky ähmiýeti; XX-XXI asyrlarda sungatlaryň özara gatnaşygy we biri-birinden täsirlenişi. Kulturologiýa we häzirkizaman sungatynyň filosofiýasy.
Maslahata ugurdaş ýokary okuw mekdepleriniň, ýagny Türkmen Döwlet çeperçilik akademiýasynyň, Türkmen Döwlet medeniýet institutynyň ýaş mugallymlary we talyplary gatnaşdy.
Ylmy-amaly maslahaty ýokary okuw mekdebiniň rektory sungaty öwreniş ylymlarynyň kanditaty R. Amangeldiýew ýolabaşçylyk etmeginde alynyp baryldy. Olar: Maýa Kulyýewa adyndaky Türkmen milli konserwatoriýasynyň “Sazyň nazaryýeti”kafedrasynyň mugallymy G.Çaryýewa “Çary Nurymowyň eserlerinde XX asyryň kompozitorçylyk tehniklarynyň ulanylyş aýratynlyklary”, “Sazşynaslyk” hünäriniň III ýyl talyby O. Meretgulyýewa “Täze kompozitorlyk tehnikalary”, şol hünäriň II ýyl talyby J.Joraýewa “XX asyryň sungatynda awangard”; Türkmen Döwlet çeperçilik akademiýasynyň “Sungaty öwreniş” kafedrasynyň mugallymy B.Hojageldiýewa “Aşgabadyň binagärlik sungaty XX-XXI asyrlarda”, “Sungaty öwreniş kafedrasynyň” V ýyl talyby B. Bäşimowa “Şekillendiriş sungatynda Magtymguly Pyragynyň çeper keşbi”; Türkmen Döwlet medeniýet institutynyň “Medeni miras” fakultetiniň IV ýyl talyby E. Atahanowa “Tükmen teatry we dessançylyk sungaty”, “Teatr sungaty” fakultetiniň IV ýyl talyby O. Hoşgeldiýewa “XX-XXI asyryň teleradio sungaty” atly ylmy temalary boýunça çykyş etdiler. Maslahatda ady agzalan ýokary okuw mekdeplerinden gelen myhmanlar özleriniň saýlap ugurlary boýunça çykyşlaryny perezentasiýa arkaly diňleýjilere ýetirip, olaryň gyzyklandyrýan soraglarynyň üstünde durulup geçilip, ara alynyp maslahatlaşyldy. Biri-biri bilen baglanyşykly bolan bu ugurlarda sungatda emele gelen akymlar dogrusynda söz açyldy. Her ugryň özüne mahsus bolan aýratynlyklar, çeperçilik stiller, häzirkizaman tehnologiýalaryň ulanylyşy barada gyzykly gürrüňler edildi. Dabaranyň ahyrynda gelen myhmanlara we çykyş edenlere ýokary okuw mekdebiň rektory tarapyndan köp sag bolsunlar aýdyldy.
