Ozal hem habar berşimiz ýaly, türkmen wekiliýeti Italiýanyň Turin şäherinde DARYA (Merkezi Aziýada zehinli ýaşlar üçin gepleşik we hereket) taslamasy boýunça ýokary derejeli toparyň iki günlük duşuşygyna gatnaşdy. Wekiliýetiň düzümine Türkmenistanyň Zähmet we ilaty durmuş taýdan goramak ministrliginiň hünärmenleri hem girdi.
«nCa» internet portalynyň Ýewropanyň Bilim gaznasynyň metbugat beýanatyna salgylanyp habar berşi ýaly, duşuşykda türkmen wekiliýetiniň agzalary hem çykyş edip, maksatnamanyň ähmiýeti dogrusynda bellediler.
«Ýaşlar üçin şertleri döretmek mümkinçiligi Türkmenistan üçin hakykatdanam möhümdir we munuň özi iş berijileriň isleglerini hem kanagatlandyrýar. DARYA ýurdumyzyň demografik ösüşini göz öňünde tutýar» diýip, Türkmenistanyň Zähmet we ilaty durmuş taýdan goramak ministriniň orunbasary Halbibi Täçjanowa duşuşygyň ilkinji gününde belledi.
Duşuşygyň ikinji gününde Türkmenistanyň bilim ministriniň orunbasary Azat Ataýew hem çykyş edip, Türkmenistanyň bilimiň zähmet bazaryndaky zerurlyklary kanagatlandyrmak üçin 200-den gowrak hünär okuw meýilnamasynda täze ülňüleriň üstünde işleýändigini mälim etdi.
