Aşgabatda ýokary derejeli iri halkara forum geçirildi, Arkadag şäherinde altynjy Wena baly geçirildi, daşary ýurt raýatynyň birnäçesi Türkmenistanyň «Magtymgulynyň Pyragynyň 300 ýyllygyna» ýadygärlik nyşany bilen sylaglandy we beýleki habarlar
Türkmenistanda
1. Şu gün Aşgabat şäherinde, Türkmenistanyň Söwda-senagat edarasynda «Döwürleriň we siwilizasiýalaryň özara arabaglanyşygy – parahatçylygyň we ösüşiň binýady» atly halkara forum geçirildi. Bu çäre beýik türkmen şahyry we filosofy Magtymguly Pyragynyň doglan gününiň 300 ýyllygyny baýram etmegiň maksatnamasynyň çäklerinde geçirilýär. Forum Türkmenistanyň Prezidenti Serdar Berdimuhamedowyň başlyklyk etmeginde geçirildi.
2. Türkmenistanyň täze Arkadag «akylly» şäherinde VI Wena baly açyldy. Oňa Halk Maslahatynyň Başlygy hormatly myhman hökmünde gatnaşdy. Gurbanguly Berdimuhamedow çykyşynda Türkmenistanyň daşary syýasatynda Awstriýa bilen ýola goýlan gatnaşyklaryň aýratyn orny eýeleýändigini hem-de şeýle medeni çäreleriň iki ýurduň arasyndaky dostlukly gatnaşyklary berkitmekdäki ähmiýetini belledi. Şeýle hem türkmen halkynyň Milli Lideri iki ýurduň arasynda dostlukly gatnaşyklary ösdürmekdäki we bu medeni çäräni guramakdaky hyzmatlary üçin Awstriýa-türkmen jemgyýetiniň ýolbaşçysy hanym Neda Bergere öz hoşallygyny bildirdi.
https://turkmenportal.com/blog/83488/v-gorode-arkadag-sostoyalsya-shestoi-venskii-bal
3. Penşenbe güni Aşgabatda Türkmenistanyň Prezidenti Serdar Berdimuhamedowyň we Gazagystan Respublikasynyň Prezidenti Kasym-Žomart Tokaýewiň arasynda gepleşikler geçirildi. Gepleşikleriň dowamynda dürli ulgamlarda, şol sanda energetika, ulag, logistika we medeni-ynsanperwer gatnaşyklar ýaly ugurlar boýunça ikitaraplaýyn hyzmatdaşlygyň meseleleri ara alnyp maslahatlaşyldy. Ykdysady gatnaşyklaryň ösdürilmegine we Türkmenistan – Özbegistan – Gazagystan – Hytaý gaz geçirijisi ýaly bilelikdäki taslamalaryň durmuşa geçirilmegine aýratyn üns çekildi. Gepleşikleriň ahyrynda döwlet Baştutanlary strategiki hyzmatdaşlygy has-da pugtalandyrmaga gönükdirilen birnäçe ylalaşyga gol çekdiler.
4. Türkmenistanyň paýtagtynda durky täzelenen we germaniýaly meşhur kardiohirurg, professor Hans Maýsneriň ady dakylan şaýoluň açylyş dabarasy boldy. Bu çäre Saglygy goraýyş we derman senagaty işgärleriniň gününiň baýram edilmeginiň çäklerinde geçirildi. Ozal 1970-nji köçe hökmünde tanalýan şaýol Arçabil şaýolundan başlap, Halkara Kardiologiýa merkezine barýar. Onuň ugrunda döwrebap saglygy goraýyş edaralary, şol sanda kelle we boýun kesellerini, göz kesellerini bejeriş merkezleri, newrologiýa, endokrinologiýa, hirurgiýa, onkologiýa we stomatologiýa merkezleri ýerleşýär.
5. Türkmen-awstriýa jemgyýetiniň ýolbaşçysy, «Galkynyş» türkmen-awstriýa žurnalynyň baş redaktory Neda Berger Türkmenistanyň «Magtymguly Pyragynyň 300 ýyllygyna» atly ýubileý medaly bilen sylaglandy. Sylag gowşurylyş dabarasy Magtymguly adyndaky Türkmen döwlet uniwersitetinde geçirildi. Sylaglar türkmen şygryýetiniň düýbüni tutan Magtymgulynyň döredijilik mirasyny öwrenmekde, aýawly saklamakda we wagyz etmekde möhüm goşant goşan daşary ýurt raýatlaryna gowşuryldy. «Turkmenportal» gutlaglara goşulýar hem-de Türkmenistan bilen Awstriýanyň arasyndaky medeni we dostlukly gatnaşyklary ösdürmäge bahasyna ýetip bolmajak goşant goşan Neda Bergeriň üstünliklerine tüýs ýürekden begenýär.
6. Türkmenistanyň Halk Maslahatynyň Başlygy Gurbanguly Berdimuhamedow Ermenistanyň Prezidenti Waagn Haçaturýan bilen duşuşdy. Gepleşikleriň dowamynda taraplar ikitaraplaýyn gatnaşyklaryň möhüm ugurlaryny ara alyp maslahatlaşdylar we iki ýurduň arasyndaky hyzmatdaşlygy mundan beýläk-de ösdürmegiň ýollaryny kesgitlediler. Söhbetdeşligiň dowamynda özara hormat goýmak we ynanyşmak ýörelgelerine esaslanýan döwletara dialogyň däp bolan dostlukly häsiýeti bellenildi. Söwda, energetika, ulag we kommunikasiýalar ulgamlarynda ykdysady hyzmatdaşlygy giňeltmegiň mümkinçiliklerine aýratyn üns çekildi.
7. Russiýanyň Prezidenti Wladimir Putin Aşgabatda Magtymguly Pyragynyň 300 ýyllygyna bagyşlanyp geçirilen halkara foruma gatnaşdy. Rus Lideri öz çykyşynda Magtymguly Pyragynyň edebi mirasynyň häzirki zaman dünýäsinde möhüm ähmiýete eýedigini belledi. Putin Magtymguly Pyragynyň beýik ynsanperwer şahsyýet, şol sanda türkmen poeziýasynyň we edebiýatynyň esaslandyryjysy hasaplanýandygyny nygtady. Russiýanyň Prezidenti Magtymgulynyň özboluşly şygryýet ýolunyň bardygyny, onuň pikirlerini gysgaça we örän jaýdar beýan edendigini nygtady. Şahyryň köp setirleri atalar sözüne, nakyllara, parasatly jümlelere öwrülip gidipdir. Prezident Putin Magtymgulynyň Russiýa bilen arabaglanyşygy barada-da durup geçip, şahyryň Astrahanyň golaýynda uzak wagtlap ýaşandygyny aýtdy. Şol ýerde häzirem türkmenler kowçum bolup ýaşaýarlar. Putin 2019-njy ýylda Funtowo obasynda Magtymguly adyndaky mekdebiň açylandygyny, Astrahanda şahyryň ýadygärliginiň oturdylandygyny we şu ýylyň sentýabr aýynda Moskwada şahyryň heýkeliniň açylyş dabarasynyň bolandygyny belledi.
Dünýäde
1. «Tesla» Golliwudda innowasion döredijiligini – «CyberCab» robotakisini tanyşdyrdy. Ol rul we pedal ýaly adaty dolandyryş elementleri bolmadyk doly awtonom ulag serişdesidir. «CyberCab» aerodinamiki şekili we amatly girişi üpjün edýän «kebelek» görnüşli gapylary bilen täsir galdyrýar. Gapdal aýnalaryň we yzky penjiräniň ýoklugy onuň ultra-döwrebap keşbini görkezýär. Salonyň içinde ýolagçylary maglumat-güýmenje enjamy hökmünde hyzmat edýän uly merkezi displeýli giň iki orunlyk ýer garşy alýar. Ilon Mask «CyberCab» ulagynyň köpçülikleýin önümçiliginiň 2026-njy ýylda başlanjakdygyny habar berdi. Robotaksini 30 000 dollardan pes bahadan satyn alyp bolar.
https://turkmenportal.com/blog/83504/kompaniya-tesla-predstavila-robotaksi-cybercab
2. londonyň Öňdebaryjy kosmetika we ýüzüň plastiki hirurgiýasy merkezi ylmy taýdan iň özüne çekiji erkek ýyldyzlary kesgitlemek üçin gözleg geçirdi. Gözlegiň usulyýeti altyn gatnaşyk baradaky gadymy grek düşünjesine esaslanýar. Sanawda birinji orny aktýor Aaron Teýlor-Jonson eýeledi, onuň ýüz keşbi ideal ölçeglere 93.04% laýyk gelýär. Ikinji orny Lýusýen Lawiskont eýeledi, ilkinji üçlügi Pol Meskal tamamlady,
https://turkmenportal.com/blog/83501/nazvany-samye-krasivye-muzhchiny-v-mire-s-tochki-zreniya-nauki
3. Fransiýanyň uly bolmadyk Darnetal şäherinde özboluşly ekologik çäre geçirildi. Ýerli häkimiýetler ýaşaýjylara köçelerden ýygnalan çilim galyndylaryny ýerli balaryçylaryň öndürýän tagamly baly bilen çalyşmagy teklip etdiler. Çärä gatnaşyjylardan bir ýarym litrlik çüýşäni çilim galyndylary bilen doldurmak haýyş edildi, muňa sylag hökmünde olara bir gap tebigy ary baly berildi. Bu başlangyç şäheriň köçeleriniň hapalanmagy bilen baglanyşykly çynlakaý meselä garşy göreşmäge gönükdirildi.
https://turkmenportal.com/blog/83496/francuzskii-gorod-obmenivaet-okurki-na-med
