«Turkmenportal» hem-de Türkmenistanyň Senagatçylar we telekeçiler birleşmesi Aşgabatda geçirilýän köpugurly ýaşlar forumynyň çäklerindäki sergide işewürligi ösdürmek boýunça bilelikdäki ýola goýan taslamasyny tanyşdyrdylar.
Taslamanyň esasyndaky hyzmatdaşlygyň çäginde TSTB-niň ähli agzalary «Turkmenportal» web saýtynyň resurslarynda öz alyp barýan işleri barada dürli görnüşli makalalary we mahabatlary ýeňillikli ýerleşdirmäge mümkinçilik alýarlar. Bu bolsa kompaniýalara önümlerini we hyzmatlaryny giň internet okyjylar köpçüligine netijeli tanatmaga we täze müşderileri hem-de hyzmatdaşlary çekmäge ýardam eder.
Şeýlelik bilen hem, Türkmenistanyň Senagatçylar we telekeçiler birleşmesiniň ähli agzalary indi «Turkmenportal.com» web saýtynda ýylyň dowamynda bir makalany örän arzan bahadan ýerleşdirip bilýärler. Mundan başga-da, TSTB-niň häzirki agzalary maglumatlar portalynyň ähli mahabat hyzmatlaryndan peýdalanmakda 30% arzanladyş alýarlar.
Şeýle-de «Turkmenportal» öz web saýtynda TSTB-niň işine bagyşlanan ýörite bölümi açdy. Bu bölümde Birleşmäniň taslamalary, bu guramanyň agzalarynyň gatnaşmagynda geçirilýän çäreler, olaryň üstünlikleri we ösüş meýilnamalary barada iň möhüm maglumatlar ýerleşdirilýär.
Türkmenistanyň Senagatçylar we telekeçiler birleşmesi — bu Türkmenistanda senagat, söwda, oba hojalygy, syýahatçylyk hem-de beýleki pudaklarda işleriň dürli görnüşleri bilen meşgullanýan 28 müňden gowrak agzany özünde birleşdirýän iň uly jemgyýetçilik guramasydyr.
TSTB kiçi we orta telekeçiligi goldamak, innowasiýalary we ýurduň eksport mümkinçiligini ösdürmek, ilatyň durmuş derejesini ýokarlandyrmak boýunça kabul edilen döwlet maksatnamalarynyň durmuşa geçirilmegine işjeň gatnaşýar. Birleşme şeýle-de agzalaryna maslahat beriş, ýuridiki, maliýe we beýleki kömekleri hem ýetirýär.
«Turkmenportal» bilen TSTB-niň arasyndaky hyzmatdaşlyk milli ykdysadyýeti diwersifikasiýalaşdyrmak we sanlylaşdyrmak boýunça döwlet syýasatynyň üstünlikli durmuşa geçirilmegine, şeýle hem Türkmenistanda kiçi we orta telekeçiligiň ösmegi üçin amatly şertleriň döredilmegine ýardam etmek maksady bilen ýola goýuldy.
Taslamanyň esasynda hyzmatdaşlyk etmegiň şertleri barada has giňişleýin maglumatlary (+993 65) 70-54-08 telefon belgisine jaň edip hem-de reklama@turkmenportal.com elektron poçtasy arkaly, şeýle hem Türkmenistanyň Söwda-senagat edarasynda 30-njy dekabra çenli dowam edýän köpugurly ýaşlar forumynyň sergisinde ýerleşdirilen TSTB-niň diwarlygyndan alyp bilersiňiz.
