Türkmenistanyň Senagatçylar we telekeçiler birleşmesiniň esaslandyrylmagynyň 14 ýyllygy mynasybetli Aşgabatda 2022-nji ýylyň 12-13-nji aprelinde TSTB-niň üstünliklerine bagyşlanan sergi guralar. Bu hakynda döwlet Baştutanymyza Ministrler Kabinetiniň mejlisinde söwda toplumyna gözegçilik edýän wise-premýer Çary Gylyjow hasabat berdi diýip, türkmen telewideniýesiniň «Watan» habarlar gepleşiginde habar berildi.
TSTB-niň gazananlaryna bagyşlanan sergide hususyýetçiligiň dürli ugurlaryna ýöriteleşen 200-den gowrak wekili öz üstünlikleri bilen tanyşdyrarlar.
Şeýle-de Gylyjow TSTB-niň esaslandyrylan gününde halkara maslahatyň guraljakdygyny habar berdi. Maslahatyň dowamynda ýurduň işewür jemgyýetçiliginiň ýeten sepgitleri we döwlete dahylsyz ulgamy ösdürmek bilen baglanyşykly «Türkmenistany 2022 – 2052-nji ýyllarda durmuş-ykdysady taýdan ösdürmegiň Milli maksatnamasynda» göz öňünde tutulan täzeçe çözgütler ara alnyp maslahatlaşylar.
TSTB-niň gazananlaryna bagyşlanan sergini hem-de maslahaty ýokary derejede guramak boýunça tabşyryklary bermek bilen, Türkmenistanyň Prezidenti Serdar Berdimuhamedow telekeçilik işiniň üstünlikli ýola goýulmagynyň ýurduň ykdysady ösüş we bazar gatnaşyklaryna geçiş derejesi bilen berk baglanyşklydygyny belledi.
Ýeri gelende bellesek, Türkmenistanyň Senagatçylar we telekeçiler birleşmesi 2008-nji ýylyň martynda esaslandyryldy. Häzirki wagtda TSTB ykdysadyýetiň we hyzmatlar ulgamynyň dürli pudaklarynda iş alyp barýan 27 müňden gowrak telekeçini özünde birleşdirýän iri jemgyýetçilik guramasydyr.
