Niderlandlardaky Rotterdamyň muzeýindäki Mark Rotkonyň surat eseri çaga tötänden oňa galtaşandan soňra zeperlendi. Sungat eseri 56 million amerikan dollary bahalanýar diýip, «MIR 24» habar berdi.
«Goýy gyzyl reňkdäki çal, mämişi, № 8» atly eser 1960-njy ýylda döredilen. Çaga oňa elini degrende, aşaky bölegindäki reňk örtüginde sypjyryk yzlary galdy. Çaganyň ady agzalmaýar, şeýle-de kimi ýitginiň öwezini dolmaga borçly ediljekdigi habar berilmeýär. Häzir sungat eserini abatlamak üçin geljekki çäreler öwrenilýär.
Suratkeş Rotko ony abstrakt ekspressionizm usulynda döredipdir. 1970-nji ýylda aradan çykan nakgaşyň işleri söwda auksionynda gymmat satylýar, mysal üçin, onuň «Gülgün, gyzyl, sary» atly işi 2012-nji ýylda 86,9 million dollara satyn alyndy diýip, «The People» neşiri habar berýär.
