23-24-nji aprelde Malaýziýanyň paýtagty Kuala-Lumpurda geçiriljek Türkmenistanyň ykdysadyýetine daşary ýurt maýa goýumlaryny çekmek boýunça halkara forumyna (TEIF 2025) dünýäniň energetika ulgamyndaky iň uly we abraýly guramalarynyň ýolbaşçylarynyň gatnaşmagyna garaşylýar.
Foruma gatnaşjak ýolbaşçylaryň arasynda OPEK-iň (Nebiti eksport edýän ýurtlaryň guramasy) Baş sekretary Haýtam Al Gais, Halkara Energetika Agentliginiň (IEA) ýerine ýetiriji direktory doktor Fatih Birol, Täzelenýän energiýa çeşmeleri boýunça Halkara agentligiň (IRENA) Baş direktory Frankesko La Kamera, Gazy eksport ediji ýurtlaryň forumynyň (GECF) Baş sekretary Mohamed Hamel, Energetika Hartiýasynyň Sekretariatynyň Baş sekretary Atsuko Hirose dagy bar.
Şeýle ýokary wekiliýetlariň gatnaşmagy Türkmenistanyň Aziýanyň, Ýewropanyň we Ýakyn Gündogaryň arasynda energetika köprüsine öwrülmek mümkinçiliklerine artýan gyzyklanmany görkezýär. Durnukly ösüş, sanlaşdyrma we dünýädäki energetika bazarlarynyň üýtgemegi ýaly häzirki döwrüň çylşyrymly şertlerinde «TEIF 2025» halkara jemgyýetçiligi üçin mümkinçilikleriň we kynçylyklaryň ara alnyp maslahatlaşylýan täsirli platformasyna öwrüler.
Mundan başga-da, şu ýyl Malaýziýanyň Günorta-Gündogar Aziýa ýurtlarynyň Assosiasiýasyna (ASEAN) başlyklyk edýändigi sebäpli, forumyň Kuala-Lumpurda geçirilmegi onuň halkara ähmiýetini artdyrýar. Bu bolsa Türkmenistanyň ynamdar hyzmatdaş hökmünde açyk hyzmatdaşlyga, maýa goýumlara we innowasiýalara taýýardygyny görkezýär.
Ýeri gelende bellesek, şu wagta çenli dünýäniň 30-dan gowrak ýurdunyň maliýe guramalarynyň we energiýa, infrastruktura hem-de ýaşyl tehnologiýalar ugurlarynda öňdebaryjy kompaniýalarynyň wekillerinden 300-den gowrak gatnaşyjynyň foruma gatnaşjakdygy tassyklandy. «TEIF 2025» forumyna gatnaşmak üçin şahsy hasaba alynyşyk 2025-nji ýylyň 15-nji aprelinde tamamlanýar.
