10 — 12-nji aprel aralygynda Wengriýanyň Seged şäherinde Durnukly ösüş boýunça 3-nji Halkara talyp liderleriň duşuşygy (ISLMS 2025) geçirildi. Bu abraýly halkara çäre Seged uniwersiteti we UI GreenMetric halkara guramasy tarapyndan bilelikde guraldy. Duşuşykda jemi 27 sany döwletden 57 sany uniwersiteti wekilçilik edýän 64 sany öňdebaryjy talyp lideri durnukly ösüş bilen baglanyşykly global meseleleri ara alyp maslahatlaşmak üçin ýygnandylar. Bu barada Türkmenistanyň Bilim ministirliginiň resmi saýtynda habar berilýär.
Bu duşuşyga Türkmenistanyň Oguz han adyndaky Inžener-tehnologiýalar uniwersitetiniň kompýuter ylymlary we maglumat tehnologiýalary fakultetiniň 4-nji ýyl talyby Dilnoza Mamutniýazowa, şeýle-de bu uniwersitetiň talyp geňeşiniň ýolbaşçysy, uniwersitetiň biotehnologiýa we ekologiýa fakultetiniň 4-nji ýyl talyby, şeýle-de BMG-niň Durnukly Ösüş Maksatlarynyň 12-njisi (SDG12) boýunça ýaş ilçisi Selbi Ataýewa, S.A.Nyýazow adyndaky Türkmen oba hojalyk uniwersitetiniň oba hojalyk önümlerini gaýtadan işlemek fakultetiniň 2-nji ýyl talyby Dawut Döwletow dagy gatnaşdy.
Üç günläp dowam eden çärä gatnaşyjylar esasy çykyşlara, toparlaýyn maslahatlara, daşky gurşawy goramak boýunça meýdan çärelerine hem-de medeni çärelere işjeň gatnaşdylar. Duşuşygyň esasy mowzugy «Durnukly geljege barýan ýollar we kynçylyklar» boldy.
Türkmen wekilleri halkara durnukly ösüş gepleşiklerine möhüm goşant goşdular. Dilnoza Mamutniýazowa we Selbi Ataýewa Türkmenistanyň Oguz han adyndaky Inžener-tehnologiýalar uniwersitetinde durmuşa geçirilýän durnukly ösüş başlangyçlary boýunça giňişleýin we täsirli çykyş etdiler. Dawut Döwletow oba hojalygy ulgamyndaky alnyp barylýan işler barada çykyş edip, azyk howpsuzlygy we oba hojalyk biliminde durnukly tejribelerini paýlaşdy.
Olar klimat üýtgemeleri, suw dolandyryşy, durnukly bilim we ylmy-barlaglar ýaly möhüm ugurlar boýunça toparlaýyn pikir alyşmalara gatnaşyp, halkara auditorýasy bilen Türkmenistandan gelýän dürlüçe garaýyşlary paýlaşdylar.
Duşuşygyň ahyrynda Durnukly ösüş meseleleri boýunça halkara ýaşlar jarnamasynyň gol çekmek dabarasy boldy. Bu resminama dünýäniň dürli künjeklerinden gelen ýaş liderleriň durnukly geljegi gurmaga bolan bilelikdäki tagallalaryny görkezýär.
