Russiýanyň Prezidenti Wladimir Putin 17-nji ýanwarda ýurda resmi sapar bilen geljek Eýranyň döwlet Baştutany Masud Pezeşkian bilen gepleşikleri geçirer.
Bu barada Kremliň metbugat gullugyna salgylanýan «Interfaks» habar berdi.
«Gepleşiklerde söwda-maýa goýum, ulag-logistika, gumanitar ulgamlarda ikitaraplaýyn hyzmatdaşlygy mundan beýläk-de giňeltmek, şeýle-de sebit we halkara gün tertibiniň möhüm meseleleri ara alnyp maslahatlaşylar» diýlip, habarda bellenýär.
Gepleşikler tamamlanandan soňra Putin we Pezeşkian Russiýa bilen Eýranyň arasynda ählitaraplaýyn strategik hyzmatdaşlyk barada ylalaşyga gol çekerler we köpçülikleýin habar beriş serişdeleri üçin metbugat beýanaty bilen çykyş ederler.
