16 — 22-nji dekabr aralygynda Aşgabatda geçirilen çagalaryň we ýetginjekleriň arasynda küşt boýunça Türkmenistanyň çempionatyna 350-den gowrak mekdep okuwçysy gatnaşdy. Ýaryşda ýaş küştçüler nusgawy, tiz (rapid) hem-de blis görnüşleri boýunça 7, 9, 11, 13, 15 we 17 ýaş derejelerinde 9 tapgyrdan ybarat şweýsar ulgamy esasynda özara güýç synanyşdylar.
Çempionata Aşgabat we Arkadag şäherlerinden, şeýle-de Ahal, Lebap, Mary we Daşoguz welaýatlaryndan türgenler gatnaşdylar. Şeýle-de ýurtdaky ilkinji hususy küşt akademiýasy bolan «Küşt Äleminiň» topary hem ýaryşa goşuldy.
Türkmenistanyň Küşt federasiýasynyň metbugat gullugynyň habar bermegine görä, ýaryşda toparlaýyn görnüşde Lebap welaýatynyň ýygyndysy mümkin bolan 108 medaldan 67-sini gazanyp birinjiligi eýeledi. Şonuň 27-si altyn medaldyr.
Ikinji orun 15 medal (4-si altyn) toplan Aşgabat şäheriniň ýygyndysyna nesip etdi. Üçünji orny 15 medal gazanan, emma şonuň diňe 2-si altyn medal bolan Mary welaýatynyň ýygyndy topary eýelemegi başardy. Dördünji ýerden 6 medal bilen (2-si altyn) ýurduň ilkinji hususy küşt akademiýasy bolan «Küşt Äleminiň» topary orun aldy. Ýaryşda Daşoguz welaýatynyň topary 4 medala (1-i altyn), Ahal welaýatynyň topary bolsa 1 bürünç medala mynasyp boldy.
«Kuboklardan, medallardan we diplomlardan başga-da, ýeňijilere çagalaryň we ýetginjekleriň arasynda küşt boýunça Türkmenistanyň çempionatynyň hemaýatkärleri «Ynamdar» onlaýn söwda dükanynyň, «Resmi Kepil» ätiýaçlandyryş kompaniýasynyň, plastmassa önümlerini öndüriji «Innowapak» kärhanasynyň, «Küşt Älemi» küşt akademiýasynyň, «ImdatBot» robototehnika merkeziniň, «ALSAT» onlaýn söwda dükanynyň hem-de «Orient» mediýa platformasynyň adyndan gymmat bahaly sowgatlar gowşuryldy» diýlip, Türkmenistanyň Küşt federasiýasynyň habarynda bellenilýär.
Bellenilişi ýaly, Türkmenistanyň Küşt federasiýasy 2025-nji ýylda 30-dan gowrak turniri geçirmegi meýilleşdirýär. Olarda 100-den gowrak medallar toplumy üçin güýç synanyşylar.
