2-nji fewralda Türkmenistanyň Prezidenti Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda ýurdy durmuş-ykdysady taýdan ösdürmegiň meseleleri, ozal kabul edilen çözgütleriň we berlen tabşyryklaryň ýerine ýetirilişi ara alnyp maslahatlaşyldy, şeýle hem täze kanun çykaryjylyk başlangyçlaryna garaldy.
Hususan-da, mejlisde täze infrastruktura desgalarynyň gurluşygy, ulag pudagynyň ösüşi, atçylyk, nebitgaz senagaty we ykdysadyýetiň beýleki möhüm pudaklary bilen bagly meseleleriň üstünde durlup geçildi. Halkara hyzmatdaşlygynyň, şol sanda Türkmenistanyň Ýewropa Bileleşigi we onuň maliýe institutlary bilen gatnaşyklarynyň meselelerine aýratyn üns çekildi.
Döwlet Baştutanynyň gol çeken resminamalary:
- «Bilim işiniň döwlet akkreditasiýasy hakynda Düzgünnamany tassyklamak hakynda» Karar;
- Ýustisiýanyň geňeşçisi Öwezmämmet Şyhmämmedowy gulluk borçlaryny talabalaýyk ýerine ýetirmän, işde goýberen düýpli kemçilikleri üçin, Aşgabat şäheriniň prokurory wezipesinden boşatmak hakynda Perman;
- «Türkmengaz» döwlet konserni tarapyndan 2 müň tonna möçberdäki suwuklandyrylan gazy dost-doganlyk kömegi hökmünde Gyrgyz Respublikasyna muzdsuz ibermek hakynda Buýruk.
Öňde boljak çäreler
5-nji fewralda Döwlet medeniýet merkeziniň Mukamlar köşgünde Hytaý Halk Respublikasynyň Türkmenistandaky Medeniýet ýylynyň ýapylyş dabarasy geçiriler.
Aprel aýynda Halkara nebit we gaz uniwersitetinde ýokary okuw mekdeplerinde bilim alýan talyplaryň arasynda II Açyk halkara informatika olimpiadasy guralar.
19-njy aprelde Halkara nebit we gaz uniwersitetinde «Berkarar döwletiň täze eýýamynyň Galkynyşy döwründe talyp ýaşlaryň ylmy garaýyşlary» atly halkara ylmy-amaly maslahat we sergi geçiriler.
Senagat we gurluşyk
2024-nji ýylda Türkmenistanda iri önümçilik hem-de durmuş maksatly binalaryň we desgalaryň 49-syny açyp ulanmaga bermek meýilleşdirilýär. Prezident Serdar Berdimuhamedow Hökümet agzalaryna desgalaryň gurluşyklarynda alnyp barylýan işleri we olaryň öz wagtynda gurlup ulanmaga berilmegini berk gözegçilikde saklamagy tabşyrdy.
Maliýe we ykdysadyýet
Türkmenistan Ýewropanyň Maýa goýum banky bilen hyzmatdaşlygy ýola goýar. Hususan-da, ikitaraplaýyn Çarçuwaly ylalaşygyň taslamasyna degişli gepleşikler geçiriler. Munuň özi Ýewropa Bileleşigi bilen gatnaşyklaryň gerimini giňeltmäge, söwda-ykdysady hyzmatdaşlygy işjeňleşdirmäge, Ýewropa döwletleriniň maýa goýumlaryny Türkmenistanda amala aşyrylýan möhüm ykdysady taslamalara çekmäge ýardam berer.
Türkmen hünärmenleri BMG-niň Ösüş maksatnamasynyň goldaw bermeginde 2024-2025-nji ýyllarda «Durnukly ösüş maksatlaryny durmuşa geçirmegiň binýady» atly taslamanyň üçünji tapgyrynyň çäklerinde maliýe esaslaryny berkitmek ulgamynda halkara tejribäni öwrenerler. Şeýle hem Türkmenistanyň Bütindünýä Söwda Guramasyna girmeginiň meselesi boýunça milli mümkinçiligi ýokarlandyrmak hem-de taslamanyň birinji we ikinji tapgyrlarynyň netijeliligini seljermek babatda çäreler geçiriler.
Ýangyç-energetika toplumy
Ulag we logistika
Atçylyk pudagy
«Türkmen atlary» döwlet birleşiginiň Arkadag şäherindäki Atçylyk ylmy-önümçilik merkeziniň barlaghanasynda atçylygy ösdürmek we ahalteke atlarynyň reňk aýratynlyklaryny kämilleşdirmek bilen bagly ylmy-barlag işleri amala aşyrylýar. Hususan-da, atlaryň arassa ganlylygyny gorap saklamak maksady bilen, genetiki seljerme işleri geçirilýär. Ýurduň atçylyk hojalyklarynda ýaş taýlar tohumçylyk hasabyna alynýar we olara ýörite şahadatnamalar berilýär.
Medeniýet
Beýik türkmen şahyrynyň we akyldarynyň doglan gününiň 300 ýyllygy mynasybetli şy ýyl ulanmaga beriljek Magtymguly Pyragynyň medeni-seýilgäh toplumynda daşary ýurtly meşhur ýazyjy-şahyrlaryň we söz ussatlarynyň heýkelleri oturdylar. Munuň özi umumadamzat gymmatlyklaryna hormatyň nyşanyna öwrüler.
Parlamentiň işi
Mejlisiň Başlygy Dünýägözel Gulmanowa ýurdy durmuş-ykdysady taýdan ösdürmegiň maksatnamalarynyň kanunçylyk taýdan üpjün edilişi we Türkmenistanyň Prezidentiniň ýanyndaky Döwlet gullugy akademiýasynyň diňleýjileri üçin guralan önümçilik-tejribe okuwlary barada maglumat berdi. Şeýle hem parlamentara gatnaşyklary pugtalandyrmak, şol sanda Hytaýyň wekiliýeti bilen geçirilen duşuşyk we GIZ-iň wekilleriniň gatnaşmaklarynda Raýat kodeksiniň täze beýanynyň taslamasyny işläp taýýarlamak boýunça guralan maslahat barada habar berildi. Deputatlar gender deňligi boýunça we Aýallaryň hukuklary baradaky Konwensiýasy boýunça Milli hasabaty işläp taýýarlamak bilen bagly okuw maslahatlaryna gatnaşdylar.
