Türkmenistanyň Döwlet ykdysadyýet we dolandyryş institutynda Türkmenistanyň Bilim ministrligi we Magtymguly adyndaky Ýaşlar guramasynyň Merkezi geňeşi tarapyndan yglan edilen «Suhangöýlük» sungaty boýunça talyplarynyň arasyndaky bäsleşigiň jemleri jemlenildi.
Bäsleşigiň esasy maksady - suhangöýlük boýunça ýaş zehinli ussatlary ýüze çykarmak, ýaşlarda döredijilikli pikirlenmek endiklerini kemala getirmek, liderlik we ugurtapyjylyk häsiýetlerini ösdürmekden ybarat boldy.
Bäsleşigiň birinji tapgyry 12-nji aprelde ýazmaça test görnüşinde geçirildi. Oňa jemi 40 talyp gatnaşdy. Test tapgyrynda öz bilimlerini we taýýarlyklaryny tassyklan alty zehinli talyp jemleýji tapgyra gatnaşmaga hukuk gazandy.
Jemleýji tapgyryň netijeleri boýunça 1-nji orna Marketing fakultetiniň talyby Begenç Halbaýew mynasyp boldy. Ol beýleki gatnaşyjylaryň arasynda özüniň söz ussatlygy bilen tapawutlanmagy başardy – diýip, Türkmenistanyň Bilim ministrliginiň saýtynda habar berilýär.
