10 — 12-nji mart aralygynda Mary welaýatyndaky «Türkmeniň ak öýi» binasy jemi 18 müň adamy öz goýnunda jemledi. Bu barada türkmen metbugatynda habar berildi.
Bu sapar «Türkmeniň ak öýi» binasynda Türkmenistanyň Döwlet sirkiniň, Arkadag şäheriniň Görogly adyndaky döwlet atçylyk sirkiniň artistleriniň we «Galkynyş» milli at üstündäki oýunlar toparynyň ezber ýigitleriniň bilelikdäki çykyşlary guraldy we ol üç günläp dowam etdi. Tomaşaçylar gyzykly we täsin oýunlara tüýs ýürekden hoşallyk bildirip, dowamly el çarpdylar. Bu ýagdaý sahnadaky her bir artistiň, şeýle-de at üstünde dürli oýunlary görkezýän ussatlaryň ruhuny göterip, çykyşlaryň biri-birinden has şüweleňli, şowhunly bolmagyna ýardam berdi.
«Galkynyş» milli at üstündäki oýunlar topary Murgap jülgesinde bolmagynyň çäklerinde günde iki gezek tomaşaçylaryň öňünde çykyş etdiler. Akrobatika, žanglýor oýunlary, degişme sahnalary, bedewli çykyşlar tomaşaçylara ruhy lezzet berdi. At üstündäki milli oýunlar, çylşyrymly tilsimler, geň-enaýy emeller, çapyp barýan bedewiň üstünde dik durmak, onuň aşagyndan geçmek, goşa atyň üstünde minara şekilini emele getirmek ýaly çykyşlar görenleri haýran galdyrdy. Sahna çykarylýan aýry-aýry bedewleriň görkezen oýunlary, saza goşup tans etmegi, çarpaýa galyp ýöremegi hiç bir tomaşaçyny biparh goýmady.
