Gurbanguly Berdimuhamedow we Şazada Alber II hyzmatdaşlygy pugtalandyrmak barada pikir alyşdylar, «Galkynyş» milli at üstündäki oýunlar topary Monte-Karloda geçirilen sirk festiwalynda altyn baýraga mynasyp boldy, PFL-iň çempiony Ýagşymyradow sportyň adamlary birleşdirýändigini we parahatçylygy ösdürýändigini aýtdy we beýleki habarlar
Türkmenistanda
1. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Monako Knýazlygyna saparynyň dowamynda Monakonyň Şazadasy Alber II bilen duşuşdy. Duşuşykda medeniýet, sport we syýahatçylyk ýaly dürli ugurlarda hyzmatdaşlygy giňeltmegiň mümkinçilikleri ara alnyp maslahatlaşyldy. Sirk sungatyny ösdürmäge we syýahatçylyk pudagynda tejribe alyşmaga aýratyn üns çekildi. Belent mertebeli myhmany resmi garşylamak dabarasy Şazadanyň köşgünde geçirildi, bu ýerde Monakonyň Şagyzy Stefaniýaniň gatnaşmagynda bilelikde ýadygärlik surata düşmek dabarasy boldy.
2. Şazada Alber II sapar üçin hoşallygyny bildirdi we Türkmenistan bilen dialogy ösdürmegiň möhümdigini aýtdy. Kosmos hyzmatdaşlygy ara alyp maslahatlaşmalaryň esasy mowzuklarynyň biri boldy. On ýyl mundan ozal Monako Knýazlygy «TürkmenÄlem52oE» türkmen emeli hemrasynyň kosmosa çykmagy üçin uçjak ugruny beripdi. Gurbanguly Berdimuhamedow ikitaraplaýyn şertnamanyň möhletiniň 2030-njy ýylda dolýandygyny aýdyp, Türkmenistanyň hyzmatdaşlygy dowam etdirmegiň mümkinçiliklerini ara alyp maslahatlaşmaga taýýardygyny tassyklady. Şeýle hem ol ikinji emeli hemrany döretmegiň üstünde işlenilýändigini aýtdy we Türkmenistanyň ony älem giňişligine çykarmaga taýýarlamakda bilelikde işlemek mümkinçiliklerini ara alyp maslahatlaşmaga gyzyklanma bildirýändigini belledi.
3. Türkmen halkynyň Milli Lideri Monakonyň Şazadasy Alber II-ni Türkmenistanyň Bitaraplygynyň 30 ýyllygy mynasybetli geçiriljek foruma gatnaşmaga çagyrdy. Şazada Alber II çakylyk üçin hoşallygyny beýan etdi we Türkmenistan bilen dialogy ösdürmegiň möhümdigini aýtdy. Şeýle hem ol Türkmenistanyň parahatçylyk döredijilikli syýasatyny goldaýandygyny we BMG-niň çäklerinde öňe sürlen başlangyçlarynyň möhümdigini aýtdy.
4. Türkmenistanyň Halk Maslahatynyň Başlygy Monako Knýazlygyna saparynyň dowamynda Monakonyň okeanografiýa muzeýine baryp gördi. Bu ýerde Gurbanguly Berdimuhamedow Şazada Alber I-niň ylmy işleri bilen tanyşdyryldy, ol öz döwrüniň görnükli alymy bolupdyr we deňiz çuňluklaryna ekspedisiýalarynyň guralmagyna goşant goşupdyr. Muzeýiň eksponatlary deňiz ekoulgamlary, olaryň görnüşleri we birek-birek hem-de daşky gurşaw bilen özara baglanyşygy, şeýle hem daşky gurşawy goramak we howanyň üýtgemegi bilen bagly meseleler barada gürrüň berýärler.
5. Türkmen halkynyň Milli Lideri Monako saparynyň dowamynda «Buig» kompaniýasynyň ýolbaşçysy Marten Buig bilen duşuşdy. Duşuşykda Türkmenistan bilen fransuz kompaniýasynyň arasyndaky hyzmatdaşlygyň häzirki ýagdaýy we geljekki mümkinçilikleri ara alyp maslahatlaşyldy. Marten Buig Türkmenistan bilen hyzmatdaşlyk etmegiň hem-de amala aşyrylýan giň gerimli taslamalary, ilkinji nobatda, ak mermerli Aşgabadyň binagärlik keşbini özgertmäge gönükdirilen taslamalary durmuşa geçirmäge gatnaşmagyň öz ýolbaşçylyk edýän kompaniýasy üçin uly hormatdygyny nygtady. Gurbanguly Berdimuhamedow Türkmenistanyň sanly ulgam boýunça hyzmatdaşlyga gyzyklanma bildirýändigini hem-de «Buig» kompaniýasynyň anyk tekliplerine seretmäge taýýardygyny belledi.
6. Türkmenistanyň «Galkynyş» milli at üstündäki oýunlar topary Monte-Karlo şäherinde 47-nji halkara sirk sungaty festiwalynda üstünlikli çykyş edip, altyn baýraga we beýleki ýörite baýraklara mynasyp boldy. Festiwalda bu meşhur topar ilkinji minutlardan tomaşaçylary özüne çeken «Türkmeniň milli atçylyk oýunlary» atly ykyşyny hödürledi. Ahalaeke atlarynyň ajaýyplygy we ýyndamlygy, artistleriň milli lybaslary, çapyksuwarlaryň utgaşykly hereketleri, çylşyrymly tilsimleriň ýokary derejede ýerine ýetirilmegi – bularyň hemmesi haýran galdyryjy tomaşany emele getirýär. «Galkynyşyň» ýerine ýetiren akrobatik we gimnastik tilsimleri, at çapmagyň ajaýyp ussatlygy Türkmenistanyň sirk sungatynyň özboluşly aýratynlygydyr.
7. Türkmen halkynyň Milli Lideri Monako Knýazlygyna saparynyň çäklerinde Monte-Karlo şäherinde halkara sirk sungaty festiwalynda üstünlikli çykyş eden «Galkynyş» milli at üstündäki oýunlar toparynyň agzalary bilen duşuşdy. Gurbanguly Berdimuhamedow «Galkynyş» toparynyň bu üstünliginiň türkmen sirk sungatynyň dünýä derejesine çykandygyny görkezýändigini aýtdy. Ol Türkmenistanyň dünýä ýurtlary, şol sanda Monako Knýazlygy bilen medeni hyzmatdaşlygy giň gerim bilen ösdürýändigini belledi we toparyň abraýly festiwala gatnaşýandygyna buýsanýandygyny aýtdy. Türkmenistanyň okgunly ösüşini alamatlandyrýan behişdi bedewler halkymyzyň milli buýsanjyna öwrüldi.
8. Prezident Serdar Berdimuhamedowyň tabşyrygy boýunça Mejlisiň Başlygy Dünýägözel Gulmanowa Kanadanyň Türkmenistanda täze bellenen Adatdan daşary we Doly ygtyýarly ilçisi Kristofer Daggandan ynanç hatyny kabul etdi. Duşuşygyň dowamynda Gulmanowa ilçini diplomatik işiniň başlanmagy bilen gutlady. Kanadanyň ilçisi mähirli garşylanandygy üçin hoşallyk bildirdi we iki ýurduň arasyndaky dostlugy we hyzmatdaşlygy berkitmek üçin ähli tagallalary etjekdigine ynandyrdy.
Dünýäde
9.Türkiýäniň Prezidenti Rejep Taýyp Ärdogan Kartalkaýa dynç alyş zolagyndaky myhmanhanada bolup geçen pajygaly ýangyndan soň 22-nji ýanwary milli matam güni diýip yglan etdi. Restoran zolagynda başlanan ýangyn içinde 234 myhman bolan köp gatly binany gurşap aldy. Netijede, 76 adam aradan çykdy, 50-den gowrak adam ýaralandy. Prezident günäkärleriň ählisiniň jogapkärçilige çekiljekdigini aýtdy.
Sportr täzelikleri
10. Türkmen MMA söweşijisi, ýarym agyr agram derejesinde PFL ligasynyň häzirki çempiony Döwletjan Ýagşymyradow sportuň parahatçylygy berkitmekde ähmiýeti barada aýtdy. Meşhur türgen bilen söhbetdeşlik Belgiýanyň «Diplomatic World» institutynyň hünärmeni Derýa Soýsal tarapyndan geçirildi. Ýagşymyradow sportyň adamlary birleşdirýändigini we parahatçylygy ösdürmegiň usuly bolup durýandygyny aýtdy. Ol Türkmenistanda çagalaryň kiçi ýaşdan sport bilen ulalýandygyny, munuň bolsa ony ýurduň medeniýetiniň möhüm bölegine öwürýändigini aýtdy. Ýagşymyradow dünýä giňişliginde Türkmenistana wekilçilik etmek mümkinçiligine buýsanýandygyny aýtdy. Şeýle hem ol ýaş nesli hiç haçan ruhdan düşmezlige we arzuwlaryna ynanmaga çagyrdy.
11. «Barselonanyň» futbolçylary Çempionlar ligasynyň esasy tapgyrynyň ýedinji aýlawynda Lissabonyň «Benfikasyndan» ynamly üstün çykdy. Portugaliýanyň paýtagtynda geçirilen duşuşyk 5:4 hasabynda tamamlandy, «Benfika» 3:1 we 4:2 hasabynda öňde barýardy. «Barselona» 18 utuk bilen Çempionlar ligasynyň sanawynda ikinji orunda barýar we möhletinden öň ýaryşyň 1/8 finalyna çykdy. «Benfika» 10 utuk bilen 18-nji orny eýeleýär.
