Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Mejlisiň Başlygynyň hem-de Ministrler Kabinetiniň agzalarynyň gatnaşmagynda Türkmenistanyň Bitaraplygynyň 30 ýyllygy hem-de 2025-nji ýylyň BMG-niň Baş Assambleýasy tarapyndan “Halkara parahatçylyk we ynanyşmak ýyly” diýlip yglan edilmegi mynasybetli çäreleri ýokary derejede geçirmek boýunça Türkmenistanyň Prezidentiniň Permanyna laýyklykda döredilen guramaçylyk döwlet toparynyň mejlisini geçirdi. Bu barada "Watan" habarlar gepleşiginde habar berildi. Bellenilişi ýaly, bu topara Türkmenistanyň Halk Maslahaty başlyklyk edýär.
Gahryman Arkadag, ilki bilen, mejlise gatnaşyjylary täze ýyla gadam basylmagy bilen gutlap, olara alyp barjak işlerinde üstünlikleri, 2025-nji ýylyň Türkmenistan üçin ösüşlere we rowaçlyklara, rysgal-döwletlilige beslenmegini arzuw etdi.
Türkmen halkynyň Milli Lideri 2025-nji ýylyň «Halkara parahatçylyk we ynanyşmak ýyly» diýlip yglan edilmegi hem-de ýurduň hemişelik Bitaraplygynyň şanly 30 ýyllyk baýramy mynasybetli öňde duran wezipeleri ara alyp maslahatlaşmak barada karara gelendigini aýtdy.
Halk Maslahatynyň Başlygy 2025-nji ýylda Garaşsyz Türkmenistanyň hemişelik Bitaraplygynyň şanly 30 ýyllyk baýramynyň giňden toýlanyljakdygyny, “Halkara parahatçylyk we ynanyşmak ýyly” hem-de hemişelik Bitaraplygyň şanly 30 ýyllyk baýramy mynasybetli Türkmenistanda we dünýä döwletlerinde birnäçe halkara çäreleriniň geçirilmeginiň meýilleşdirilýändigini aýtdy.
– Ýakynda gol çekilen Permanyň esasynda bu ugurda döredilen guramaçylyk döwlet toparyna Türkmenistanyň Halk Maslahaty ýolbaşçylyk edýär. Biz hem Halk Maslahaty bolup, bu baýramçylyk dabaralaryny we halkara çärelerini ýokary derejede geçirmek üçin ähli tagallalary ederis. Ýurdumyzyň asuda, abadan we bagtyýar durmuşyna gönükdirilen asylly işlere mynasyp goşant goşarys – diýip, türkmen halkynyň Milli Lideri belledi we bu çäreleri ýokary derejede geçirmek bilen baglanyşykly birnäçe guramaçylyk meselelerine ünsi çekdi.
