Türkmenistanyň Prezidenti Serdar Berdimuhamedow wise-premýer T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. "Watan" habarlar gepleşiginde habar berlişi ýaly, iş maslahatynda ýurduň oba hojalyk toplumynda hem-de welaýatlarynda alnyp barylýan işler, şeýle hem Oba milli maksatnamasynyň ýerine ýetirilişi bilen baglanyşykly meselelere garaldy.
Ilki bilen, welaýatlaryň häkimleri sebitlerde dowam edýän möwsümleýin oba hojalyk işleri barada hasabatlary berdiler. Hasabatlarda bellenilişi ýaly, häzirki wagtda welaýatlaryň bugdaý ekilen meýdanlarynda degişli işler alnyp barylýar. Gowaça ekiljek meýdanlary ekişe taýýarlamak maksady bilen, sürüm, tekizleýiş, topragy mineral dökünler bilen gurplandyrmak işleri dowam etdirilýär. Bu işler bilen bir hatarda, ekiş möwsüminde daýhanlary ýokary hilli tohumlar bilen üpjün etmek üçin gowaça tohumyny taýýarlamak, şeýle hem ekişde ulanyljak oba hojalyk tehnikalaryny we gurallaryny abatlamak hem-de talabalaýyk saklamak boýunça zerur çäreler görülýär. Şunuň bilen birlikde, welaýatlarda gök-bakja ekinleriniň ýazky ekişini guramaçylykly geçirmek maksady bilen, bu ekinleriň tohumlaryny hem-de ekiljek ýerlerini taýýarlamak boýunça işler alnyp barylýar.
Häkimler welaýatlaryň çägindäki medeni-durmuş maksatly binalaryň ýyladyş ulgamlarynyň kadaly işledilmegini üpjün etmek hem-de Oba milli maksatnamasyna laýyklykda şu ýyl welaýatlarda açylyp ulanmaga berilmegi meýilleşdirilýän desgalardaky gurluşyk işleriniň ýagdaýy barada hem hasabat berdiler.
Prezident Serdar Berdimuhamedow hasabatlary diňläp, dowam edýän möwsümleýin oba hojalyk işleriniň, hususan-da, bugdaý meýdanlaryndaky ideg işleriniň agrotehnikanyň kadalaryna laýyklykda ýerine ýetirilmegini, oba hojalyk ekinleriniň ýazky ekişine talabalaýyk taýýarlyk görülmeginiň möhümdigini belledi we bu babatda häkimlere anyk tabşyryklary berdi.
Döwlet Baştutany şeýle-de häkimlere Oba milli maksatnamasyna laýyklykda, welaýatlarda şu ýyl üçin meýilleşdirilen işleriň ýokary hilli hem-de öz wagtynda ýerine ýetirilmegini gözegçilikde saklamagy tabşyrdy.
Iş maslahatynyň barşynda wise-premýer T.Atahallyýew hem ýurtda dowam edýän möwsümleýin oba hojalyk işleriniň barşy barada hasabat berdi. Hasabatda ýazky ekişde ulanyljak oba hojalyk tehnikalaryny möwsüme taýýarlamak hem-de talabalaýyk saklamak boýunça zerur çäreleriň görülýändigi, welaýatlarda ýeralmanyň we beýleki gök-bakja ekinleriniň ekiljek meýdanlaryny we bu ekinleriň tohumlaryny ýazky ekiş möwsümine taýýarlamak boýunça degişli işleriň geçirilýändigi barada hem aýdyldy.
Prezident Serdar Berdimuhamedow hasabaty diňläp, oba hojalyk pudagynyň milli ykdysadyýetdäki möhüm ornuna ünsi çekdi we wise-premýere häzirki wagtda oba hojalygynda ýaýbaňlandyrylan möwsümleýin işleriň agrotehnikanyň kadalaryna laýyklykda geçirilmegini gözegçilikde saklamagy tabşyrdy.
Döwlet Baştutany iş maslahatyna gatnaşyjylara ýüzlenip, häzirki wagtda dowam edýän möwsümleýin oba hojalyk işlerine ýene-de bir gezek ünsi çekdi we welaýatlaryň bugdaý meýdanlarynda ideg işleriniň agrotehniki kadalara laýyk geçirilmegini üpjün etmegi, şu ýyl gowaça ekiljek ýerlerde fosfor döküni bilen gurplandyryş, sürüm we tekizleýiş işleriniň geçirilişini berk gözegçilikde saklamagy tabşyrdy.
Prezident Serdar Berdimuhamedow gowaça ekişi baradaky meselä ünsi çekip, ekiş möwsümine çenli pagta öndürijileri ýokary hilli gowaça tohumlary bilen üpjün etmek üçin ähli zerur işleri geçirmegiň, tehnikalary we gurallary ýaz ekişine talabalaýyk taýýarlamak üçin degişli işleri alyp barmagyň möhümdigini belledi.
Döwlet Baştutany Mary welaýatynda ýetişdirilen gant şugundyrynyň hasylyny zaýasyz ýygnap almagyň, ýeralma hem-de gök-bakja ekinleriniň ýazky ekişine çenli ýerleri we tohumlary häzirden taýýarlamagyň zerur talap bolup durýandygyny aýtdy.
Prezident Serdar Berdimuhamedow welaýatlarda Oba milli maksatnamasynyň ýerine ýetirilişine berk gözegçilik etmegi, ýaşaýyş jaýlarynyň, mekdepleriň we çagalar baglarynyň ýyladyş ulgamlarynyň işledilişini, ilatyň elektrik energiýasy, tebigy gaz we agyz suwy bilen üpjünçiligini berk gözegçilikde saklamagy, ýurdy 2022 — 2028-nji ýyllarda durmuş-ykdysady taýdan ösdürmegiň Maksatnamasyna hem-de Oba milli maksatnamasyna laýyklykda, welaýatlarda şu ýyl meýilleşdirilen işleriň öz wagtynda we ýokary hilli ýerine ýetirilmegi üçin zerur çäreleri görmegi tabşyrdy.
