Ozal habar berşimiz ýaly, Arkadag şäherinde türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagyň ýolbaşçylygynda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň müdiriýetiniň mejlisi geçirildi.
Mejlisiň barşynda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň kanunçylyk hukuk namalaryna girizilen üýtgetmeler barada hasabat bermek üçin Gaznanyň hukukçysy M.Hojamberdiýewa söz berildi. Bu barada TDH ýazýar.
Hasabatda Gahryman Arkadagyň tabşyryklaryndan we gymmatly maslahatlaryndan ugur alnyp, Gaznanyň Tertipnamasyna, Gaznanyň ýanyndaky Ýaşulular geňeşi hakynda Düzgünnamasyna we Gaznanyň müdiriýetiniň düzümine täzeden seredilendigi hem-de olaryň taslamalarynyň taýýarlanylandygy habar berildi.
Bellenilişi ýaly, agzalan resminamalar Gaznanyň esaslandyryjysynyň 2023-nji ýylyň 15-nji aprelinde çykaran 1-nji Karary bilen tassyklandy. Gaznanyň işiniň geriminiň giňelmegi bilen Tertipnamada kesgitlenen wezipeleri ýerine ýetirmek bilen bagly guramaçylyk taýdan işler hem artýar. Şunuň bilen baglylykda, Tertipnama Gaznanyň Prezidenti tarapyndan wezipä bellenilýän we wezipeden boşadylýan iş birlikleri girizildi. Olar Gaznanyň dolandyryş işleri boýunça ýerine ýetiriji direktory – wise-prezidenti, Gaznanyň bejeriş işleri boýunça ýerine ýetiriji direktory – wise-prezidenti, Gaznanyň önümçilik işleri boýunça ýerine ýetiriji direktory – wise-prezidenti wezipelerinden ybarat. Olar Gazna öz ygtyýarlyklarynyň çäginde ýolbaşçylyk edýärler diýlip bellenilip, Tertipnamanyň 13-nji bölegi täze mazmunda beýan edildi.
Girizilen wezipeler bilen baglylykda, Gaznanyň müdiriýetiniň düzümine gaýtadan seredilip, onuň taslamasy taýýarlanyldy.
Gaznanyň ýanynda hereket edýän Ýaşulular geňeşiniň agzalary tarapyndan Türkmenistanyň Garaşsyzlygyny berkitmekde, milli däp-dessurlary ösdürmekde, halkyň agzybirligini hem-de jebisligini pugtalandyrmakda, ýaş nesle edep-terbiýe bermekde ýaşuly adamlar tarapyndan işler alnyp barylýar. Şunuň bilen baglylykda, Tertipnamada Gaznanyň ýanyndaky Gaznanyň Prezidenti tarapyndan döredilýän Ýaşulular geňeşi hakyndaky kadalar aýratyn bapda beýan edildi.
Agzalan bapda Ýaşulular geňeşiniň Gaznanyň Tertipnamasynda kesgitlenen maksatlaryny guramaçylykly amala aşyrmaga ýardam berýän maslahat beriji topar bolup durýandygy, Ýaşulular geňeşine Gaznanyň Prezidentiniň ýolbaşçylyk edýändigi hem-de onuň düzümini we ol hakynda Düzgünnamany tassyklaýandygy beýan edildi. Ýaşulular geňeşiniň maksatlary we wezipeleri, geňeşiň agzalarynyň hukuklary hem-de borçlary Gaznanyň ýanyndaky Ýaşulular geňeşi hakynda Düzgünnama bilen kesgitlenilýär.
Gaznanyň hukukçysy M.Hojamberdiýewa Ýaşulular geňeşi hakynda Düzgünnamanyň taslamasynyň taýýarlanandygyny aýdyp, olary Gahryman Arkadagyň garamagyna hödürledi.
Türkmen halkynyň Milli Lideri, Türkmenistanyň Halk Maslahatynyň Başlygy hasabaty diňläp, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň işini kämilleşdirmek hakynda Karara hem-de Gaznanyň ýanyndaky Ýaşulular geňeşi hakynda Düzgünnama gol çekdi. Şeýle hem Gahryman Arkadag kada-kanunçylyga laýyklykda, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň Tertipnamasyny hem-de müdiriýetiniň düzümini öz Karary bilen tassyklaýandygyny aýdyp, degişli resminamalara gol çekdi. Resminama laýyklykda, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň müdiriýetiniň düzüminde iki sany wise-prezident wezipeleri döredildi. Olar Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça hem-de senagat ugry boýunça wise-prezidenti wezipelerinden ybarat. Bu barada aýtmak bilen, Gahryman Arkadag gol çekilen resminamalara laýyklykda, müdiriýetiň agzalaryny jemgyýetçilik başlangyçlary esasynda wezipä bellemek baradaky soraglara geçdi.
Mejlisde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti wezipesine Oguljahan Atabaýewanyň, iş dolandyryjysy wezipesine Hajymyrat Hajymyradowyň, media habarlar wekili wezipesine bolsa Azat Jepbarowyň teklip edilýändigi barada aýdyldy.
Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň müdiriýetiniň jemgyýetçilik başlangyçlary esasynda wezipä bellenen agzalary münbere geçip, hoşallyklaryny beýan etdiler we täze wezipelerinde işini nähili alyp barjakdygy barada aýtdylar.
Gahryman Arkadag öňde durýan wezipeleri ýerine ýetirmekde bilelikdäki tagallalaryň zerurdygyna ünsi çekip, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň müdiriýetiniň jemgyýetçilik başlangyçlary esasynda wezipä bellenen agzalaryna birnäçe anyk görkezmeleri berdi.
