Ozal habar berşimiz ýaly, 6-njy dekabrda Prezident Serdar Berdimuhamedow sanly ulgam arkaly nobatdaky Hökümet mejlisini geçirdi. Mejlisiň barşynda şu ýylyň on bir aýynda alnyp barlan işleriň jemleri jemlenildi, ýurdy durmuş-ykdysady taýdan ösdürmek boýunça ileri tutulýan wezipeler ara alnyp maslahatlaşyldy.
Hökümet mejlisiniň ahyrynda Prezident Serdar Berdimuhamedow Ministrler Kabinetiniň agzalaryna ýüzlenip, şu ýylyň on bir aýynda alnyp barlan işleriň netijeleriniň Garaşsyz, Bitarap Türkmenistanyň uly üstünliklere eýe bolýandygyna aýdyň şaýatlyk edýändigini aýtdy. Bellenilişi ýaly, ýurtda kabul edilen maksatnamalar üstünlikli amala aşyrylýar. Medeni-durmuş, senagat we önümçilik maksatly desgalaryň gurluşygy alnyp barylýar.
Döwlet Baştutany ýylyň tamamlanmagyna az wagtyň galandygyny aýdyp, bu ýyly gowy netijeler bilen jemläp, täze — 2025-nji ýyly mynasyp garşylamak üçin degişli işleri alyp barmagyň zerurdygyny nygtady.
