Türkmenistana BMG-niň Nýu-Ýork şäherinde ýerleşýän ştab-kwartirasyndan hoş habar gelip gowuşdy. 2-nji dekabrda Birleşen Milletler Guramasynyň Baş Assambleýasynyň 79-njy sessiýasynyň dowamynda Türkmenistanyň başlangyjy bilen «Merkezi Aziýada ýadro ýaragyndan azat zolak hakyndaky Şertnama» atly Kararnama biragyzdan kabul edildi. "Watan" habarlar gepleşiginde habar berlişi ýaly, bu barada 6-njy dekabrda sanly ulgam arkaly geçirilen Hökümet mejlisinde wise-premýer, daşary işler ministri R.Meredowyň hasabatynda aýdyldy. Şunuň bilen baglylykda, Türkmenistanyň daşary syýasat ugruny durmuşa geçirmekde BMG bilen köpugurly hyzmatdaşlygyň ösdürilmegine aýratyn ähmiýet berilýändigi bellenildi.
Wise-premýer, ýurduň DIM-niň ýolbaşçysy döwlet Baştutanyny bu daşary syýasy ýeňiş bilen Ministrler Kabinetiniň agzalarynyň adyndan tüýs ýürekden gutlady hem-de berk jan saglyk, Watanyň abadançylygynyň, halkara abraýynyň has-da belende galmagynyň, türkmen halkynyň rowaçlygynyň bähbidine alyp barýan asylly işlerinde uly üstünlikleri arzuw etdi.
Hökümet mejlisiniň ahyrynda döwlet Baştutany ýurda Birleşen Milletler Guramasyndan gelip gowşan hoş habara, ýagny şu ýylyň 2-nji dekabrynda bu guramanyň Baş Assambleýasynyň 79-njy sessiýasynyň dowamynda Türkmenistanyň başlangyjy bilen «Merkezi Aziýada ýadro ýaragyndan azat zolak hakyndaky Şertnama» atly Kararnamanyň biragyzdan kabul edilmegine ünsi çekdi.
Prezident Serdar Berdimuhamedow Birleşen Milletler Guramasyna agza ýurtlaryň Türkmenistanyň başlangyjyny goldamagynyň, dünýä döwletleriniň bu Kararnamanyň awtordaşlary hökmünde çykyş etmeginiň Bitarap Türkmenistan üçin örän uly abraýdygyny nygtady. "Täze Kararnamanyň kabul edilmegi Watanymyzyň ählumumy derejede parahatçylygy goramak, özara bähbitli dost-doganlyk gatnaşyklaryny ösdürmek ugrunda edýän tagallalarynyň giň goldaw tapýandygynyň aýdyň nyşanydyr" diýip, Türkmenistanyň Prezidenti belledi we geljekde-de bu ugurda alnyp barylýan işleriň yzygiderli dowam etdiriljekdigini aýdyp, hemmeleri «Merkezi Aziýada ýadro ýaragyndan azat zolak hakyndaky Şertnama» atly Kararnamanyň kabul edilmegi bilen tüýs ýürekden gutlady.
