6-njy noýabrda Türkmenistanyň daşary işler ministri Raşid Meredow bilen Ýewropanyň Täzeleniş we ösüş bankynyň Türkmenistandaky wekilhanasynyň ýolbaşçysy Erik Liwniniň arasynda duşuşyk geçirildi. Onda Türkmenistan bilen Ýewropanyň Täzeleniş we ösüş bankynyň arasyndaky hyzmatdaşlygy berkitmek meseleleri boýunça pikir alşyldy. Bu barada Türkmenistanyň daşary syýasat edarasynyň metbugat gullugy habar berýär.
Çeşmäniň bellemegine görä, duşuşygyň dowamynda Türkmenistan bilen ÝTTB-niň arasyndaky hyzmatdaşlygyň häzirki ýagdaýy we ony giňeltmegiň geljegi ara alnyp maslahatlaşyldy. Şunuň bilen baglylykda, taraplar Ýewropanyň Täzeleniş we ösüş bankynyň Türkmenistan boýunça bäş ýyllyk strategiýasyny öz içine alýan ulgamlaýyn işi ýola goýmaga gönükdirilen tekliplere garadylar.
Şeýle-de söhbetdeşler «ýaşyl» şäherler, suw çeşmeleri ýaly ugurlar boýunça döwlet we hususy düzümleriň gatnaşmagynda durmuşa geçirilmegi meýilleşdirilýän taslamalar babatda hem pikir alyşdylar.
