Azerbaýjan bilen Türkmenistanyň arasyndaky söwda dolanyşygy 485,46 million dollara ýetip, geçen ýylyň degişli döwri (125,9 million dollar) bilen deňeşdirilende, 3,8 esse ýokarlandy diýip, «Trend.az» habar berýär.
Azerbaýjanyň Döwlet gümrük komitetiniň maglumatyna görä, Türkmenistan şu ýylyň ilkinji 6 aýynda Azerbaýjan bilen söwda taýdan iň gowy 15 ýurduň hataryna goşuldy.
Bu döwürde Türkmenistanyň Azerbaýjana eksporty 439,03 million dollar boldy, bu bolsa 2022-nji ýylyň degişli döwri bilen deňeşdirilende, 3,8 esse köpdür (115.08 million dollar) diýip, çeşme belleýär.
Hasabat döwründe Azerbaýjanyň importynyň umumy mukdarynda Türkmenistanyň paýy artdy we geçen ýylyň birinji ýarymyndaky 1,81 göterim bilen deňeşdirilende, 5,36 göterim boldy.
2023-nji ýylyň ýanwar—iýun aýlary aralygynda Türkmenistanyň Azerbaýjandan importy, 2022-nji ýylyň degişli döwri bilen deňeşdirilende, 2,7 esse ýokarlanyp (10,82 million dollar), 46,42 million dollara ýetdi.
Bu döwürde Azerbaýjanyň umumy eksport mukdaryndaky Türkmenistanyň paýy 0,26 göterime barabar boldy (2022-nji ýylyň birinji ýarymynda 0,06 göterim).
Ýatlap geçsek, 2022-nji ýylda Azerbaýjan bilen Türkmenistanyň arasyndaky söwda dolanyşygy 535,3 million dollara barabar bolupdy.
