Türkmenistanyň we Russiýa Federasiýasynyň Gahrymany, instruktor, synagçy-kosmonawt, «Roskosmos» döwlet korporasiýasynyň kosmonawtlar toparynyň serkerdesi Oleg Kononenko Prezident Serdar Berdimuhamedowa hem-de türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa Arkadag şäheriniň açylmagy mynasybetli gutlag hatlaryny iberdi. Bu hatlar «Türkmenistan» gazetinde çap edildi.
— Sizi hem-de Türkmenistanyň ähli halkyny Arkadag şäheriniň açylmagy bilen gutlaýaryn. Bu şanly waka ýurduňyzyň ykdysady we ylmy-tehnologik taýdan deňsiz-taýsyz ösüşiniň, türkmen halkynyň zähmetsöýerliginiň, zehininiň hakyky nyşany hökmünde Türkmenistanyň taryhynyň ýyl ýazgysyna altyn harplar bilen ýazylar.
Siziň baştutanlygyňyzda Garaşsyz Türkmenistan innowasiýalara, örän çylşyrymly tehnologik çözgütlere hem-de öňdebaryjy ylmy işläp taýýarlamalara esaslanýan ägirt iri taslamalary amala aşyrmaga ukyplydygyny tutuş dünýä görkezdi. Siziň döwlet Baştutany hökmünde bu ugra aýratyn üns berýändigiňizi bilýärin we ýetilen sepgitlere haýran galýandygymy beýan edýärin — diýip, Oleg Kononenko Prezident Serdar Berdimuhamedowa iberen hatynda nygtaýar.
Oleg Kononenkonyň belleýşi ýaly, Arkadag şäheriniň häzirki zaman şähergurluşygynyň dünýä derejesindäki nusgasy hökmünde binagärligiň göwherine, şäher ulgamynyň ösdürilmegine innowasion çemeleşmäniň iň ýokary mysalyna öwrüljekdigini doly ynam bilen aýdyp bolar. Täze şäheriň eýýäm abraýly halkara düzümleriň güwänamalaryna mynasyp bolmagy hem muny tassyklaýar.
— Ynsan zehininiň täsin binagärlik eseri bolan bu şäheriň meniň Watanymda — ösüşiň we abadançylygyň täze belentliklerine ynamly öňe barýan ýurtda, gülleýän Türkmenistanda gurlandygyna buýsanýaryn — diýip, O.Kononenko gutlag hatynda nygtaýar.
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa ýollan gutlag hatynda bolsa Türkmenistanyň we Russiýa Federasiýasynyň Gahrymany, instruktor, synagçy-kosmonawt, «Roskosmos» döwlet korporasiýasynyň kosmonawtlar toparynyň serkerdesi Oleg Kononenko:
— Sizi hem-de Türkmenistanyň halkyny şanly waka — Arkadag şäheriniň açylmagy bilen tüýs ýürekden gutlaýaryn. Türkmenistanda binagärlik hem-de tehnologik çözgüdi babatda täsin täze şäher gurmak baradaky Siziň başlangyjyňyz ýokary derejede ösen döwlet hökmünde ýurduňyzyň geljegine strategik garaýşyňyzyň aýdyň subutnamasy bolup durýar. Arkadag şäheri gadymy döwürlerden bäri türkmen halkyna mahsus bolan iň gowy şähergurluşyk ýörelgelerini hem-de şäherleşmegiň öňdebaryjy meýillerini özünde utgaşdyrmak bilen, Türkmenistanyň täze belentliklere batly gadamyny, onuň senagat taýdan okgunly ösýän, kuwwatly ylmy we tehniki mümkinçiliklere eýe bolan, durmuş ugurly ykdysadyýetli, innowasion çözgütleri giňden ornaşdyrýan häzirki zaman döwletleriniň hataryna ynamly goşulyşmagyny alamatlandyrýar.
Ajaýyp we buýsançly Arkadag adyny göterýän täze şäheriň müňlerçe adam üçin hemmetaraplaýyn amatly şertleriň döredilen ýeri bolmak bilen çäklenmän, ylmyň we tehnikanyň, bilimiň, sportuň, giň halkara işewürlik hyzmatdaşlygynyň, ýaşlaryň döredijilik başlangyçlarynyň hem merkezine öwrüljekdigine ynanýaryn.
Täze şähere, onuň ähli ýaşaýjylaryna tüýs ýürekden abadançylyk we rowaçlyk arzuw edýärin. Goý, ol meniň Watanymyň — geljege ynamly garaýan Türkmenistanyň ösüşiniň täze tapgyrynyň aýdyň nyşanyna, onuň bagtyýarlygynyň beýanyna öwrülsin! — diýip ýazýar.
