Şu gün — 13-nji dekabrda Türkiýäniň Prezidenti Rejep Taýyp Ärdoganyň Türkmenistana sapar bilen gelmegine garaşylýar. Ärdogan Türkmenistana şu ýylyň 13-14-nji dekabrynda Türkmenistanyň, Türkiýäniň we Azerbaýjanyň Prezidentleriniň Awazada geçiriljek sammitine gatnaşmak üçin barar diýlip, türk Lideriniň Metbugat gullugy habar berýär.
— Türkmenistanyň Prezidenti Serdar Berdimuhamedowyň çakylygy boýunça 14-nji dekabrda Awazada geçiriljek sammitde Azerbaýjanyň Prezidenti Ilham Aliýewiň we Türkiýäniň Prezidentiniň gatnaşmagynda üç dostlukly we doganlyk ýurtlaryň arasynda, esasan-da, söwda, energetika we ulag pudagynda hyzmatdaşlygy has-da çuňlaşdyrmak barada möhüm meseleler ara alnyp maslahatlaşylar — diýlip, metbugat beýanatynda aýdylýar. Şeýle hem sammitde hyzmatdaşlygyň kanunçylyk binýadyny berkitjek birnäçe şertnamalara gol çekiljekdigi habarda bellenilýär.
Türkiýäniň Prezidentiniň Metbugat gullugy sammitiň çäginde ikitaraplaýyn duşuşyklaryň hem geçiriljekdigini habar berdi.
