Türkmenistanda

1. Hytaýyň «China Southern» awiakompaniýasy Siandan Aşgabada göni howa gatnawlaryny amala aşyryp başlady. Uçuş tertibine laýyklykda, howa gatnawlary her hepdäniň şenbe güni amala aşyrylar. Aşgabadyň Astanadan, Bişkekden, Duşenbeden we Daşkentden soňra «China Southern» awiakompaniýasynyň Merkezi Aziýadaky bäşinji uçuş ugruna öwrülendigini bellemek gerek.

2. 18-nji maýda Türkmenistanyň Konstitusiýasynyň we Döwlet baýdagynyň güni giňden belleniler. Şanly sene mynasybetli ýurduň paýtagtynda we welaýatlarynda maslahatlary, sergileri, mowzuklaýyn duşuşyklary we beýleki baýramçylyk çärelerini geçirmek göz öňünde tutulýar. Aşgabatda Konstitusiýa binasyna we Türkmenistanyň Baş baýdagyna gül goýmak dabarasy, sungat ussatlarynyň konserti geçiriler.

3. 21-nji maýda Mukamlar köşgünde Türkmenistanyň halk artisti Gülşat Gurdowanyň «Bagtly men» atly solo konserti geçiriler. Türkmen estradasynyň iň parlak ýyldyzlarynyň biri bolan Gülşat Gurdowa söýlüp diňlenýän aýdymlaryny we täze eserlerini ýerine ýetirer. Konsert 18:00-da başlanar.

4. Tatarystan Respublikasynyň Baştutany Rustam Minnihanow «Telegram» kanalynda Akdus atly alabaý itiniň suratyny paýlaşdy. Suratda it tokaýda ýaşyl otlukda ýatyr. Bu surata berlen teswirlerde Tatarystanyň ýaşaýjylary onuň nähili ulalandygyna haýran galdylar. Ýatlatsak, Gurbanguly Berdimuhamedow 2021-nji ýylyň ýazynda şol wagt heniz güjük bolan alabaýy Respublikanyň Baştutanyna sowgat edipdi. Tatar dilinden terjime edilende, itiň ady «Ak dost» diýmekdir.

5. Prezident Serdar Berdimuhamedowyň gol çeken Kararyna laýyklykda, Gurluşyk we abatlaýyş işleriniň bahasyny kesgitlemegiň tertibine üýtgetmeler we goşmaçalar girizildi. Resminama «Hukuk namalary hakynda» Türkmenistanyň Kanunynyň 30-njy maddasyna laýyklykda gol çekildi.

6. Astana şäherinde Ykdysady, ylmy-tehniki we medeni hyzmatdaşlyk boýunça Hökümetara türkmen-gazak toparynyň 12-nji mejlisi geçirildi. Duşuşygyň dowamynda söwda, ykdysady ulgamda, ulag, maliýe, oba we suw hojalygy, gurluşyk, medeniýet we syýahatçylyk, bilim we ylym, şeýle hem nebit-gaz pudaklarynda hyzmatdaşlygy ösdürmegiň meselelerine garaldy.

Dünýäde

7. Türkiýede 28-nji maýda geçiriljek prezident saýlawlarynyň ikinji tapgyry yglan edildi. Birinji tapgyrdaky sesleri sanamagyň çäklerinde saýlaw gutularynyň 100%-iniň açylmagy netijesinde, häzirki prezident Rejep Taýyp Ärdogan 49,35% ses aldy, garşydaş dalaşgär Kemal Kylyçdaroglu saýlawçylaryň 45%-iniň goldawyny aldy. «ATA bileleşiginiň» üçünji dalaşgäri Sinan Ogan 5,22% ses aldy. Dalaşgärlikden çekilen dalaşgär Muharrem Inje 0,43% ses aldy. Birinji tapgyrda ýeňiş gazanmak üçin dalaşgärleriň biri 50% we goşmaça ýene bir ses almalydy. Şeýle bolmandygy sebäpli prezidentlik ýaryşy ikinji tapgyra dowam eder.

8. Özbegistan özüniň «CubeSat» ylym-bilim hemrasyny döretmegi we uçurmagy meýilleşdirýär. Taslama «Uzbekkosmos» agentligi bilen Innowasion ösüş agentliginiň arasynda gol çekilen hyzmatdaşlyk hakynda Jarnamanyň çäklerinde durmuşa geçiriler. Hemranyň synag işleri Birleşen Arap Emirlikleriniň bazalarynyň birinde geçiriler.

Sport habarlary

9. «Žalgirisiň» türkmen zenan futbolçysy Maýa Musaskaýa täze topary üçin ilkinji pökgüsini tora girizdi. 23 ýaşly Musaskaýa Litwanyň Zenanlar çempionatynyň 7-nji tapgyrynda «Banga» toparyna garşy duşuşygyň 41-nji minutynda geçirilen pökginiň awtory boldy. Wilnýus şäheriniň topary bu ýeňişden soň 13 utuk toplap, çempionatyň sanawynda ikinji orna çykdy. Musaskaýa 2023-nji ýylyň başynda Türkiýäniň «Dudullu spor» toparyndan «Žalgirise» geçdi. Zenan futbolçy Stambul toparynyň düzüminde 2022-nji ýylyň güýzünden bäri çykyş edip, 14 duşuşyga gatnaşdy we 1 pökgi geçirdi.

10. Şu gün Çempionlar ligasynyň ýarymfinalynyň jogap duşuşygynyň çäklerinde Italiýanyň «Inter» we «Milan» toparlary duşuşar. Duşuşyk «Matç TW» teleýaýlymynda göni ýaýlymda görkeziler we Aşgabat wagty 23:40-da başlanar. Toparlaryň ilkinji duşuşygy «Interiň» 2:0 hasabynda ynamly ýeňşi bilen tamamlandy. Milan derbisiniň ýeňijisi Çempionlar ligasynyň finalynda «Mançester Siti» – «Real» jübütiniň iň güýçlüsi bilen duşuşar. Çempionatyň finaly 10-njy iýunda Stambulda geçiriler.

11. Futbol boýunça Türkmenistanyň çempionatynyň Ýokary ligasynyň ýedinji tapgyrynyň ähli oýunlary 17-nji maýda çarşenbe güni geçiriler. Tapgyryň maksatnamasy «Şagadam» bilen «Merwiň», şeýle hem «Aşgabat» bilen «Altyn asyryň» arasyndaky gapma-garşylyk bilen açylar. Iki duşuşyk hem ýerli wagt bilen 17:30-da başlanar. 18:00-da çempionatyň öňdebaryjysy bolan «Arkadag» topary myhmançylykda Marynyň «Energetigi» bilen duşuşar. On bäş minutdan soň, 18:15-de Balkanabadyň «Nebitçisi» geçen ýylky çempion «Ahaly» kabul eder.