Türkmenistanda

1. Ankarada hormatly Prezident Serdar Berdimuhamedow bilen Türkiýe Respublikasynyň Prezidenti Rejep Taýyp Ärdoganyň arasynda gepleşikler geçirildi. Ikiçäk we iki ýurduň wekiliýetleriniň giňeldilen düzümdäki geçirilen duşuşygyň dowamynda doganlyk döwletleriň Baştutanlary syýasy-ykdysady, medeni, energetika, ulag, maýa goýumlar we innowasiýalar ýaly ugurlarda hyzmatdaşlygy ösdürmegiň meselelerini ara alyp maslahatlaşdylar.

2. 2023-nji ýylyň 8 aýynda Türkmenistanyň eksportynyň umumy mukdary 7,8 milliard ABŞ dollaryna barabar boldy. Muny Türkmenistanyň Döwlet daşary ykdysady iş bankynyň başlygy Rahymberdi Jepbarow «OGT-2023» halkara nebit-gaz forumynda eden çykyşynda mälim etdi. R.Jepbarow şeýle hem «Fitch Ratings» reýting gullugynyň soňky hasabatyna görä, 2022-nji ýylda Türkmenistanyň daşarky karzynyň jemi içerki önümiň 4,9 göterimine barabardygyny aýtdy.

3. GDA agza ýurtlaryň Hökümet Baştutanlarynyň Geňeşiniň nobatdaky mejlisi 2024-nji ýylyň maý aýynda Aşgabatda geçiriler. Muny Gyrgyzystanyň Ministrler Kabinetiniň Başlygy Akylbek Žaparow Arkalaşygyň Hökümet Baştutanlarynyň Geňeşiniň Bişkekde geçirilen duşuşygynda mälim etdi.

4. Ýakyn wagtda Balkan welaýatynyň Türkmenbaşy şäheriniň golaýynda kuwwaty 1,574 MWt bolan täze elektrik bekediniň düýbüni tutmak dabarasy geçiriler. Ýerli hünärmenleriň türk kärdeşleri bilen bilelikde gurjak desgasy üçünji ýurtlaryň üsti bilen Türkiýä elektrik energiýasyny eksport etmek üçin mümkinçilik döreder diýip, Türkmen döwletiniň Baştutany aýtdy.

5. Ministrler Kabinetiniň Başlygynyň orunbasary Hojamyrat Geldimyradow Şanhaý Hyzmatdaşlyk Guramasyna agza döwletleriň Hökümet baştutanlarynyň 22-nji mejlisine gatnaşdy. Mejlise Belarus Respublikasynyň, Eýranyň, Gazagystanyň, Gyrgyzystanyň, Hytaýyň, Mongoliýanyň, Russiýa Federasiýasynyň, Täjigistanyň gem-de Özbegistanyň Hökümet ýolbaşçylary, şeýle-de Hindistanyň we Pakistanyň daşary işler ministrleri gatnaşdylar. Mejlisiň jemleri boýunça 14 resminama gol çekildi.

6. Türkmenistanda «Ýylyň türkmen edermen Alabaýy» halkara bäsleşiginiň ikinji tapgyry geçirildi. Oňa birinji tapgyrda ýeňiş gazanan 20 sany türkmen alabaýy gatnaşdyryldy. Bäsleşigiň ikinji tapgyrynda alabaýlaryň her biri berlen şertlere laýyklykda, birnäçe dürli päsgelçilikleri ýeňip geçmeli. Emin agzalary bu milli gymmatlyk hasaplanýan wepaly jandarlaryň daş keşbine we özüni alyp barşyna, ýagny olaryň batyrgaýlygyna we sabyrlylygyna aýratyn üns berdiler.

Dünýäde

7. Ýerewanda bary-ýogy 6 ýaşyndaky suratkeş Mariýa Mhitaryanyň eserleriniň sergisi geçirilýär. Sergide gyzjagazyň 50 sany eseri görkezilýär. Olaryň köpüsi ejesine bagyşlanypdyr. Ýaş suratkeş açyk, arassa reňkleri, esasanam, sary we gök reňkleri gowy görýär. Şeýle-de ol portretleri çekmäge-de ökde. Mariýanyň suratlary Russiýada, Gruziýada, Gresiýada we Müsürde görkezildi. Özüniň ilkinji baýragyna bolsa ol 4 ýaşynda ilkinji halkara bäsleşiginde eýe boldy.

8. Russiýanyň «TNT» teleýaýlymynda «Ýyldyzlaryň täze fabrikasy» üçin kasting dowam edýär. Rus meşhur aýdym-saz şowunyň 2024-nji ýylda gaýtadan dikeldilmegi meýilleşdirilýär. Ýyllaryň dowamynda «Ýyldyzlaryň fabrikasy» şowy «1-nji» teleýaýlymda ýaýlyma berlipdi. «Korni» topary, Polina Gagarina, Wiktoriýa Daýneko we häzirki döwrüň meşhur aýdymçylary onuň dürli ýyllarda ýeňijileri bolupdylar.

Sport täzelikleri

9. AFK-nyň Kubogy ugrundaky ýaryşyň 3-nji tapgyrynda «Altyn Asyr» topary «Merwden» 2:1 hasabynda üstün çykdy. Duşuşygyň 97-nji minutynda Selim Nurmyradowyň jerime urgusyndan geçiren goly toparyna 3 utuk almaga ýardam etdi. AFK-nyň Kubogyndaky jogap duşuşygy Aşgabatda 7-nji noýabrda geçiriler.