Türkmenistan

1. Sankt-Peterburgyň Hökümeti Arkadag şäheri bilen hyzmatdaşlyk etmek barada resminamalary taýýarlamak boýunça iş alyp barýar. Bu barada Sankt-Peterburgyň gubernatory Aleksandr Beglow türkmen halkynyň Milli Lideri, Halk Maslahatynyň Başlygy Gurbanguly Berdimuhamedowa doglan güni mynasybetli iberen hatynda belläp geçdi.

2. Wernadskiý şaýolundaky Moskwanyň Uly döwlet sirkiniň hem-de Reňkli bulwardaky Ýuriý Nikulin adyndaky Moskwa sirkiniň artistleri «Galkynyş» türkmen atçylyk topary bilen bilelikde Arkadag şäherinde çykyşlarynyň maksatnamasyny açdylar. Sirk çykyşlary üçin petekler Türkmenistanyň Döwlet sirkiniň kassalarynda satylýar.

3. Türkmenistanyň Pensiýa gaznasy ýurduň telekeçilerine 2023-nji ýylyň birinji ýarymýyllygy üçin pensiýa gatançlaryny tölemek boýunça hasabat döwrüniň başlanandygyny habar berýär. «Döwlet pensiýa ätiýaçlandyryşy hakynda» Türkmenistanyň Kanunynyň 23-nji maddasyna laýyklykda, pensiýa gatançlaryny şu ýylyň 1-nji iýulyndan 15-nji awgusty aralygynda tölemek mümkindir. Şeýle-de gatançlary Türkmenistanyň Zähmet we ilaty durmuş taýdan goramak ministrliginiň saýtynda onlaýn görnüşde tölemek mümkindir.

4. Arkadag şäheriniň köpugurly hassahanasynda «Türkmenistanyň lukmanlarynyň jemgyýetçilik guramasy» atly halkara ylmy maslahat geçirildi. Foruma Türkmenistanyň saglygy goraýyş ulgamynyň edaralarynyň ýolbaşçylary we işgärleri, daşary ýurtly myhmanlar — dürli daşary ýurt kompaniýalaryň wekilleri, öňdebaryjy hassahanalarynyň, institutlarynyň professorlary we hünärmenleri gatnaşdylar. Çykyşlarda täze şäheriň durmuş düzüminde halkara ölçeglere laýyk gelýän lukmançylyk edaralarynyň bardygy bellenildi. Şolaryň hatarynda 350 orunlyk köpugurly hassahana, 150 orunlyk onkologiýa merkezi, 150 orunlyk Enäniň we çaganyň saglygyny goraýyş merkezi, «Tiz kömek» merkezi, saglyk öýi, şeýle hem ýöriteleşdirilen awtoulag serişdeleriniň dürli görnüşleri bilen üpjün edilen Awtoulaglar kärhanasy bar.

Dünýäde

5. Amerikan kompaniýasy uçýan awtoulaglar üçin deslapky sargytlary kabul edip başlady. Ýakyn günlerde «Alef Aeronautics» bu ulagyň uçuşa ýaramlylygy üçin dünýäde ilkinji bolup güwänama aldy. Ol ABŞ-niň Raýat awiasiýasynyň federal müdirligi tarapyndan berildi, ýagny awtoulag kanuny taýdan uçmak üçin rugsatnama aldy. Gürrüň geçen ýylyň oktýabr aýynda tanyşdyrylan «Model A» elektromobili barada barýar. Öndürijileriň bellemeklerine görä, ulagyň wertikal (dikligine) uçmak we gonmak mümkinçiligi bardyr, şonuň esasynda hem ol ýerde-de, howada-da hereket edip bilýär.

6. Ady rowaýata öwrülen «Ýalla» atly özbek ansambly 50 ýyllygyny belledi. Meşhur aýdym-saz ansamblynyň sazandalary Özbegistanyň Prezidenti Şawkat Mirziýoýewiň adyndan ordenler bilen sylaglandylar. «Ýalla» ansambly ХХ asyryň 70-nji ýyllarynda meşhurlyk gazandy. Onuň «Uçkuduk», «Çaýhana», «Gündogaryň ýyldyzy» («Zwezda Wostoka») ýaly aýdymlary häzir hem söýlüp diňlenilýär we olar Özbegistanyň daşynda hem meşhurdyr.

Sport habarlary

7. Adybir şäheriň «Arkadag» futbol topary Türkmenistanyň çempiony «Ahaly» dostluk duşuşygynda 3:0 hasabynda ýeňdi. Ýeňijileriň düzüminden Begmyrat Baýow 40-njy minutda birinji pökgini tora girizdi. Ahyrky hasaby Şanazar Tirkişew we Orazberdi Myradow kesgitlediler. «Arkadag» üçin bu duşuşygyň täze 10 müňlük stadionda geçirilen ilkinji oýun bolandygyny bellemek gerek. Duşuşyk başlamazdan öň açylyş dabarasy geçirildi.

8. «Transfermarkt» statistika portaly Türkmenistanyň milli ýygyndysynyň oýunçysy Mirza Beknazarowy futbol boýunça Estoniýanyň çempionatynyň Premium ligasyndaky «Narwa Trans» toparynyň düzümine girizdi. 23 ýaşly Beknazarow ondan öň «Ahalyň» düzüminde çykyş edipdi we ýanwar aýynda ony erkin agent hökmünde terk edipdi. Ýarymgoragçynyň transfer bahasy 150 müň ýewro deňdir, eston topary bilen şertnama 2023-nji ýylyň 31-nji dekabryna çenli baglaşylandyr. 13-nji iýulda «Narwa Trans» UEFA-nyň Konferensiýa ligasynyň saýlama tapgyrynda Ermenistanyň «Pýunkom» topary bilen duşuşar.

9. 17 ýaşa çenli ýetginjekleriň arasynda futbol boýunça Aziýanyň Kubogynyň finalynda Ýaponiýanyň milli ýygyndysy Koreýa Respublikasynyň toparyndan üstün çykdy. Ýaryş Tailandda geçirildi. Duşuşyk ýapon toparynyň 3:0 hasabynda ýeňşi bilen tamamlandy.