Türkmenistanyň Prezidentiniň Malaýziýa sapary tamamlandy, Gurbanguly Berdimuhamedow Awtosport merkeziniň gurluşyk taslamalary bilen tanyşdy we täze sport ulagyny synagdan geçirdi, repçi Emin Rasen Aşgabat şäherine geldi we beýleki habarlar
Türkmenistanda
1. Türkmenistanyň Prezidenti Serdar Berdimuhamedow Malaýziýa ilkinji resmi saparyny tamamlady. Aşgabadyň Halkara howa menzilinde Prezident Serdar Berdimuhamedowy resmi adamlar garşyladylar we guralan ýokary derejedäki gepleşikleriň üstünlikli geçmegi hem-de gazanylan netijeler bilen tüýs ýürekden gutladylar.
2. Serdar Berdimuhamedowyň Malaýziýa resmi saparynyň çäklerinde Premýer-ministr Anwar Ibrahim bilen gepleşikler geçirilildi, onuň jemleri boýunça resminamalaryň uly toplumyna gol çekildi. Giňişleýin düzümde geçirilen resminamalara gol çekmek dabarasynda taraplar Bilelikdäki Beýannamany tassykladylar we wiza talaplarynyň kem-käsleýin ýatyrylmagy, awiasiýa senagaty babatynda hyzmatdaşlyk etmek, diplomatlary taýýarlamak pudagynda hyzmatdaşlyk etmek babatda özara düşünişmek hakynda we beýleki şertnamalary alyşdylar.
3. Saparynyň çäklerinde Türkmenistanyň Prezidenti «Petronas» binasyna bardy hem-de bu kompaniýanyň ýolbaşçylary bilen duşuşdy. Duşuşykda nebitgaz pudagynda hyzmatdaşlygyň ileri tutulýan ugurlary hem-de onuň geljegi ara alnyp maslahatlaşyldy.
4. Saparyň jemleri boýunça Prezident Serdar Berdimuhamedow Premýer-ministr Anwar Ibrahimi sapar bilen Türkmenistana gelip görmäge çagyrdy. Anwar Ibrahim çakylygy hoşallyk bilen kabul etdi. Iki tarap saparyň senesiniň diplomatik ýollary arkaly ylalaşylmagy barada ylalaşdylar.
5. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türkmenistanyň Içeri işler ministrliginiň Awtomobil sport toplumynyň täze binalar toplumyny gurmak üçin meýilleşdirilýän ýere geldi we bu ýerde binalar toplumynyň taslamalary bilen tanyşdy. Awtomobil sport toplumynyň guruljak ýeriniň umumy meýdany 71 gektar bolup, ol Aşgabatdan 40 kilometrden gowrak demirgazykda ýerleşýär. Täze toplumyň desgalarynyň binagärlik aýratynlygy boýunça taslamalaryň üç toplumy teklip edilýär. Taslamada görkezilişi ýaly, merkez iki bölekden ybarat bolup, olarda awtomobil sporty boýunça türgenleşikleri geçirmek, sport ulaglaryny ýaryşlara taýýarlamak, türgenler bilen okuwlary geçmek, halkara derejeli ýaryşlary guramak üçin ähli zerur mümkinçilikler göz öňünde tutulypdyr. Şeýle hem toplumyň binalarynyň biriniň nyşany hökmünde ahalteke bedewiniň, beýlekisi üçin bolsa alabaýyň şekili saýlanyp alnypdyr.
6. Soňra türkmen halkynyň Milli Liderinden täze sport ulagyny synagdan geçirip bermegi haýyş edildi. Sport awtoulagy Gurbanguly Berdimuhamedowyň dolandyrmagynda sähra ýollary boýunça çylşyrymly menzilleri geçdi.
7. Türkmen gelip çykyşly eýranly repçi Emin Rasen täze ýyl baýramçylygy mynasybetli geçiriljek konserte gatnaşmak üçin Aşgabada geldi. Saparynyň dowamynda ýaşajak ýeri bolan Aşgabadyň «Arçabil» myhmanhanasynda artisti mähirli garşy aldylar. Artist tomaşaçylary şowhunly konsert maksatnamasy hem-de täze hitleri bilen begendirjekdigini belledi. Repçiniň konserti 23-nji dekabrda Gyşky oýunlar sport toplumynda bolar.
https://turkmenportal.com/blog/86054/iranskii-reper-emin-rasen-pribyl-v-ashhabad
8. Türkmenistanyň Janly tebigatyň milli muzeýi Haýwanat baglarynyň we akwariumlaryň Ýewraziýa birleşigine doly agza boldy. Bu baradaky degişli şahadatnamany Russiýanyň Türkmenistandaky ilçisi Iwan Wolynkin Aşgabat şäher häkimine gowşurdy. Duşuşygyň dowamynda taraplar bu ugurda mundan beýläk-de geljekki hyzmatdaşlygyň meselelerini ara alyp maslahatlaşdylar.
https://turkmenportal.com/blog/86010/ashhabadskii-zoopark-vstupil-v-chleny-earaza
9. Şu günler Täze ýyl söwda nokatlary Türkmenistanyň ähli ýerinde işleýär. Göçme söwda meýdançalarynda haryt we dürli baýramçylyk önümleriniň bolçulygy artýar. Ýerli öndürijiler türkmenistanlylara ýokary hilli bäsdeşlige ukyply önümleri hödürleýärler. Tekjelerde konditer önümleri, ter miweler, gök önümler, et we balyk tagamlary bar. Alyjylara ýetip gelýän 2025-nji – Ýaşyl agaç ýylany ýylynyň nyşany bilen bezelen önümler hödürlenýär.
https://turkmenportal.com/blog/86022/novogodnie-yarmarki-rabotayut-vo-vseh-regionah-turkmenistana
Dünýäde
1. Russiýanyň telewideniýesinde iň ýokary reýtingli realiti-şoularyň biri bolan «Dom-2-niň» surata düşürilen ýer bölegi satuwa çykaryldy. Emlägiň bahasy 690 million rubl. Ol MKAD ýolundan 24 km uzaklykda, Ista derýasynyň kenaryndaky Lobanowo obasynda ýerleşýär. Hut şu ýerde 2003-nji ýyldan bäri millionlarça teletomaşaçyny özüne çeken wakalar bolup geçdi.
https://turkmenportal.com/blog/86048/uchastok-populyarnogo-teleshou-doma2-vystavili-na-prodazhu
2. Britan monarhy Karl III kinorežissýor Kristofer Nolana rysar derejesini berdi, onuň aýaly we prodýuser Emma Tomasa bolsa ledi derejesi berildi. Bukingem köşgi bu jübütiň kinematografiýany ösdürmäge goşan goşandy üçin, şol sanda «Gara rysar» atly meşhur trilogiýany we «Oskar» baýragyna eýe bolan «Oppengeýmer» fimini döretmek bilen bu hormata mynasyp bolandygyny belledi.
https://turkmenportal.com/blog/86039/korol-karl-iii-posvyatil-v-rycari-sozdatelya-oppengeimera
Sport täzelikleri
1. Türkmen hokkeý topary Hytaýyň Harbin şäherinde geçiriljek IX Aziýanyň gyşky oýunlaryna 2025-nji ýylyň 4-nji fewralynda Hindistanyň milli ýygyndysyna garşy oýun bilen başlar. Topar «C» toparça düşdi we bu ýerde Hytaýyň Makaosyndan hem-de Hytaýyň Gonkongyndan garşydaşlary bilen oýnar. Toparda üstünlikli çykyş eden halatynda, türkmen topary beýleki diwizionlaryň toparlary, şol sanda birinji we ýokarky diwizionlaryň toparlary bilen pleý-off oýunlarynda medallar ugrunda bäsleşmäge mümkinçilik alar.
2. Türkmenistanyň Futbol federasiýasynyň (TFF) eminler bölümi Ahal welaýatynyň Bedenterbiýe we sport baradaky Baş müdirligi bilen bilelikde Tejen şäherinde ýaş eminleri saýlamak boýunça okuw-maslahat seminaryny geçirdi. Bu seminar Ahal welaýatyndaky sport mekdepleriniň ýaş tälimçilerini we eminlik bilen gyzyklanýan orta mekdepleriň ýokary synp okuwçylaryny çekmäge gönükdirildi. 40 töweregi ýaş hünärmene eminlik etmegiň inçe aýratynlyklary barada anyk düşündirişler berildi we olar oýun düzgünleriniň derňewine gatnaşdylar.
https://turkmenportal.com/blog/86055/v-turkmenistane-startoval-otbor-molodyh-futbolnyh-sudei
