Girmek
Hytaý Türkmenistan bilen möhüm ugurlar boýunça özara gatnaşygy giňeltmäge, ulag-aragatnaşyk baglanyşygyny pugtalandyrmaga hem-de «Hytaý — Merkezi Aziýa» formatynyň çäginde hyzmatdaşlygy çuňlaşdyrmaga taýýar. Bu barada Hytaýyň Türkmenistandaky ilçisi Szi Şumin «Нейтральный Туркменистан» gazetinde çap edilen interwýusynda belledi.
«Hytaý tarapy türkmen tarapy bilen bilelikde esasy ugurlar boýunça hyzmatdaşlygy giňeltmäge, ulag baglanyşygyny pugtalandyrmaga, ynsanperwer taslamalaryň durmuşa geçirilişini çaltlandyrmaga, şeýle hem «Hytaý — Merkezi Aziýa» mehanizminiň çäklerinde hyzmatdaşlygy has-da çuňlaşdyrmaga taýýar» diýip, diplomat belledi.
Ilçi şu ýyl ýurduň hemişelik Bitaraplygynyň 30 ýyllygynyň bellenilýändigine ünsi çekdi. Mundan 30 ýyl ozal BMG-niň Baş Assambleýasy Türkmenistanyň hemişelik Bitaraplygy hakynda ilkinji gezek resmi taýdan Kararnama kabul edipdi. Szi Şuminiň aýtmagyna görä, geçen üç onýyllygyň dowamynda türkmen tarapy oňyn bitaraplyk syýasatyny yzygiderli alyp bardy. Bu bolsa ýurduň ösüşi üçin amatly şertleri döretdi hem-de sebitiň hem-de dünýäniň parahatçylygyna we durnuklylygyna möhüm goşant goşdy.
Şeýle-de diplomat Türkmenistanyň Bitaraplygynyň 30 ýyllygynyň hytaý-türkmen gatnaşyklarynyň 30 ýyllygynyň bellenilýän ýylyna gabat gelýändigini nygtady. Onuň bellemegine görä, soňky ýyllarda ikitaraplaýyn gatnaşyklar giň gerimli strategik hyzmatdaşlyk derejesine çykdy, ähli ugurlardaky hyzmatdaşlyk bolsa ýokary netijelilik bilen häsiýetlenýär.