Türkmenistanyň tomusky yssy howasy — munuň özi islendik awtoulagdan ätiýaçly bolmagy talap edýär. Haçan-da termometriň görkezijisi +40°C-dan ýokary galsa, ýa bolmasa-da käbir sebitlerde +45°C we ondanam ýokary bolsa, awtoulagyň beýle  ýagdaýa dogry taýýarlanmagy möhüm ähmiýete eýe bolýar. Adatdan daşary temperatura hatda iň ygtybarly awtoulaglary hem hatardan çykaryp biler, şonuň üçinem sürüjilere tomus möwsümine aýratyn ünsli taýýarlanmak zerurdyr.

Sowadyjy ulgam — esasy üns bermeli zat

Howa gaty yssy bolan halatynda hereketlendirijiniň sowadyjy ulgamy mümkinçiliginiň çäginde işleýär. Bu üns bermegi talap edýän ilkinji zatlaryň biridir. Antifrizi her 3-4 ýyldan bir gezek çalyşmaly, ýöne yssy howa şertlerinde bu döwri 2-3 ýyla çenli gysgaltmak has netijelidir. Giňeldiş gabyndaky suwuklygyň ýagdaýyny barlaň: eger ol bulanyk, goýy reňkli ýa-da onda çökündi görünýän bolsa, antifrizi derrew çalyşmak zerurdyr.

Radiatorlary ýuwmaga aýratyn üns beriň. Çöl howa şertlerinde radiatorlar gum we tozanyň basmagy bilen tiz-tizden bitip durýar. Şonuň üçin ony azyndan ýylda bir gezek, has gowusy ýylda iki gezek ýuwmak maslahat berilýär. +40°C howa temperaturasynda hapa radiator ulagy birnäçe sagatlap süreniňizden soň, hereketlendirijiniň gyzmagyna sebäp bolup bilýär.

Sowadyjy ulgamyň ähli düzüm bölekleriniň işleýşini barlaň: suw nasosy, termostat, sowadyjy wentilýatory. Wentilýator belli bir temperatura ýetende açylmaly we ähli göz öňünde tutulan režimlerde işlemeli. Yssy howa şertlerinde sowadyjy ulgamyň sähelçe näsazlygy hem hereketlendirijide çynlakaý müşgillik döredip bilýändir.

Kondisioner — örän möhüm zerurlyk

Has yssy bolýan günleri kondisioner işletmek ulaga gelşik bermekden öňinçä zerurlykdyr. Kondisioneriň kompressorynyň işleýşini barlaň we ýöriteleşdirilen hyzmat merkezinde ony diagnostikadan geçiriň. Sowadyjy her ýyl doldurylyp durulmalydyr, sebäbi bu ulgam ýokary temperatura şertlerinde üznüksiz işledilýär.

Salonyň filterini çalyşmagy ýatdan çykarmaň — çöl howa şertlerinde ol çalt bitýär. Howa sowadyjy ulgamyň antibakterial täzelenmesini her 6 aýdan geçirmek maslahat berilýär. Sebäbi ýokary temperatura we çyglylyk bakteriýalaryň köpelmegi üçin amatly şertleri döredýär.

Adatdan daşary yssy howa şertleri üçin motor ýagy

+40°C-den ýokary howa temperaturalarda adaty motor ýagy motory sowadyp bilmeýär. Esasanam, awtoulagyňyz 100 müň kilometrden gowrak ýol geçen bolsa, has ýokary ýapyşykly ýaga geçmegi göz öňünde tutuň. Yssy howa şertlerinde ýag çalşygynyň aralyklary öndüriji tarapyndan maslahat berilýän möhletlerden 20-30% azaldylmalydyr.

Ýagyň hiline üns beriň — howanyň has çylşyrymly şertlerinde belli brendleriň subut edilen sintetiki ýaglaryny saýlamak ýerliklidir. Olar öz aýratynlyklaryny ýokary temperaturada has gowy saklaýarlar we hereketlendirijini örän ygtybarly goraýarlar.

Tekerler we basyş

Asfaltyň ýokary temperaturasy (+70°C-e ýetip bilýän) tekerlere goşmaça agram berýär. Tekerleriň basyşyny yzygiderli barlap duruň — yssy howada ol ýokarlanýar, bu bolsa tekeriň ýarylmagyna sebäp bolup bilýär. Tekerleriň basyşyny irden, heniz olaryň salkyn halyna ölçemelidir.

Tekerleriň jaýryk we çüýreme ýaly ýagdaýlaryny yzygiderli barlap duruň. Ýokary temperaturada rezin basym könelýär. Şonuň üçinem yssy howa şertlerinde tekeriň ömri öndürijiniň kesgitlemeginden 20-30% gysga bolup biler.

Nowanyň we interýeriň goragy

Güýçli ultramelewşe şöhleleri lak-boýag örtügine tiz zeper ýetirýär. Gyşdan soň ulagy gowy edip ýuwuň we gorag woskuny ýa-da polimer örtügini çalyň. Ulagyň nowasynyň iň gowşak ýerlerine goraýjy örtügi dakmagy hem göz öňünde tutup bilersiňiz.

Ulagyň içini goramak üçin bolsa ony goýan mahalyňyz penjiräňize Gün şöhlelerinden goraýjy örtügi dakyň. Salonyň plastiki düzüm böleklerini ultramelewşe süzgüçli ýörite kondisioner himiki serişdeleri bilen süpüriň. Deri elementleri aýratyn idegi talap edýär. Şol sebäpdenem deriniň ýarylmagynyň öňüni almak üçin ýokary hilli deri kondisioner serişdelerini ulanyň.

Goşmaça ätiýaçlyk çäreleri

Diňe bir içmek üçinem däl-de, ulagyň sowadyjy ulgamynyň dürli ýagdaýlarda doldurylmagy üçin elmydama ýanyňyz bilen suw göteriň. Awtoulagda ilkinji lukmançylyk kömeginiň enjamyny we Günden goraýjy serişdeleri saklaň.

Ulag bilen bir ýere çykmaga meýil etseňiz, mümkin boldugyndan howanyň salkyn wagtyna gabatlaň. Munuň üçin ir säher bilen ýa-da giç agşam iň amatly wagtdyr. Esasanam, hereketlendiriji işleýän wagty Günüň astynda uzak saklanmajak boluň.

Ähli tehniki suwuklyklaryň derejesini yzygiderli barlaň. Olar yssy howa şertlerinde has çalt bugarýar. Adatdan daşary temperaturada gaýnap bilýän tormoz suwuklygyna aýratyn üns beriň.

Awtoulagy aşa yssy howa üçin taýýarlamak hemmetaraplaýyn çemeleşmegi we täsir edip biljek has kiçi zatlary hem ünsden düşürmezligi talap edýär. Ýadyňyzdan çykarmaň: öňüni alyş çäreleri üçin çykdajylar hemişede çynlakaý bozulmadan soň ýüze çykýan abatlaýyş işleriniň çykdajylaryndan az bolýandyr. Howanyň temperaturasy +40°C-den ýokary bolsa-da, kiçijik näsazlyk hem agyr netijelere getirip biler. Şonuň üçin iň gowusy ätiýaçly bolup, tomus möwsüminiň başynda awtoulagyň doly diagnostikasyny geçirmek juda ýerliklidir.