Girmek
28-nji noýabrda Magtymguly adyndaky Türkmen döwlet uniwersitetinde «Medeni miras: geçmişden geljege» ÝUNESKO kafedrasynyň guramagynda «Türkmenistan — ÝUNESKO: tebigy miras goralyp saklanylýar» atly çäre geçirildi. Bu barada uniwersitetiň resmi saýtynda habar berildi.
Geologiýa muzeýinde geçirilen duşuşykda ÝUNESKO-nyň işleri barada Türkmenistanyň Milli toparynyň jogapkär sekretary, Türkmenistanyň Gahrymany Çynar Rüstemowa, şeýle hem ýurdumyzyň ýokary okuw mekdepleriniň ÝUNESKO klublarynyň ýolbaşçylary, Magtymguly adyndaky TDU-nyň wekilleri gatnaşdylar. Duşuşykda BMG-niň Bilim, ylym we medeniýet meseleleri boýunça guramasynyň (ÝUNESKO) Türkmenistanda hereket edýän ÝUNESKO klublarynyň alyp barýan işleri, Türkmenistanyň Bitaraplygynyň 30 ýyllygy mynasybetli geçirilýän çäreler boýunça pikir alşyldy.
Magtymguly adyndaky Türkmen döwlet uniwersitetiniň ÝUNESKO kafedrasynyň agzasy, geologiýa-mineralogiýa ylymlarynyň kandidaty Anatoliý Buşmakin muzeýiň ekspozisiýasy bilen myhmanlary tanyşdyrdy hem-de ýurdumyzyň baý tebigy mirasy barada, bu mirasyň görnükli nusgalarynyň ÝUNESKO-nyň Adamzadyň bütindünýä mirasynyň sanawyna girizilmegi barada gürrüň berdi.