Türkmenistan Respublikasynyň Belarus Respublikasyndaky ilçisi, Türkmenistanyň Garaşsyz Döwletleriň Arkalaşygynyň (GDA) tertipnamalaýyn we beýleki edaralarynyň ýanyndaky hemişelik doly ygtyýarly wekili Nazarguly Şagulyýew Arkalaşygyň agza döwletleriniň hemişelik doly ygtyýarly wekilleriniň geňeşiniň nobatdaky mejlisine gatnaşdy. Mejlis 17-nji iýunda Minsk oblastynyň «EkoTechnoPark – Wolma» merkeziniň binasynda geçirildi.

GDA-nyň Ýerine ýetiriji komitetiniň resmi saýtynda berlen habara görä, hemişelik wekiller Duşenbe şäherinde geçirilen GDA agza döwletleriň Hökümet baştutanlarynyň Geňeşiniň jemlerini jemläp, kabul edilen resminamalaryň we gazanylan ylalaşyklaryň ýerine ýetirilmegi boýunça geljekki wezipeleri kesgitlediler.

Mejlisiň dowamynda gün tertibine girizilen ähli meseleler ara alnyp maslahatlaşyldy we 18 resminama kabul edildi. Olaryň arasynda GDA agza döwletleriň arasynda agyr maşyngurluşygyny ösdürmek boýunça hyzmatdaşlyk baradaky Ylalaşyk, GDA agza döwletleriň ýeňil senagat ulgamynda hyzmatdaşlygyny ösdürmegiň Konsepsiýasy we onuň ýerine ýetirilişi boýunça çäreleriň Meýilnamasy, GDA ýurtlarynyň howa hereketini guramak boýunça milli ulgamlarynyň utgaşdyrylmagy baradaky Konsepsiýa, şeýle hem GDA agza döwletleriň ilatynyň saglygyny goramak babatdaky hyzmatdaşlyk boýunça Konsepsiýa ýaly resminamalar bar.

Şeýle hem, GDA-nyň Hökümet baştutanlarynyň duşuşygynda GDA ýurtlarynyň meýletinçileriniň ýyllyk forumyny döretmek we GDA giňişliginde syýahatçylygy ösdürmäge goşant goşanlar üçin täze döşe dakylýan nyşany – «Garaşsyz Döwletleriň Arkalaşygynda syýahatçylygy ösdürendigi üçin» diýen nyşany döretmek kararyna gelindi.

Mejlisiň ikinji meselesinde GDA-nyň daşary işler ministrleriniň geňeşiniň, Hökümet baştutanlarynyň geňeşiniň we GDA agza ýurtlaryň döwlet Baştutanlarynyň geňeşiniň güýzki mejlisleriniň gün tertibi üçin teklipler hem ara alnyp maslahatlaşyldy.