Türkmenistanyň Gruziýadaky, Türkiýedäki we Hindistandaky diplomatik wekilhanalary Bütindünýä welosiped gününe, Halkara parahatçylyk we ynanyşmak ýylyna, şeýle hem Türkmenistanyň hemişelik bitaraplygynyň 30 ýyllygyna bagyşlanan welosiped ýörişlerini geçirdiler.

Gruziýada welosiped ýörişi Tbilisi we gadymy Msheta şäherleriniň köçeleriniň ugry boýunça geçirildi. Oňa Gruziýanyň Milli welosport federasiýasynyň wekilleri, ýerli türgenler we tälimçiler gatnaşdylar.

Türkmenistanyň Gruziýadaky ilçisi Döwletmyrat Seýitmämmedow ýörişe gatnaşýanlaryň öňünde çykyşynda dünýäde howanyň üýtgemeginiň şertlerinde Bütindünýä welosiped gününiň aýratyn ähmiýetini belledi. Ol BMG tarapyndan Türkmenistanyň başlangyjy bilen yglan edilen bu halkara senäniň sporty dostlugyň ilçisi hökmünde giňeltmäge we daşky gurşawy goramaga ýardam edýändigini nygtady.

Şeýle ýöriş Türkiýede Ankara şäheriniň ýanyndaky Eýmir kölüniň kenaryndaky ýörite welosiped ýolunda geçirildi. Ilçi Mekan Işangulyýew çykyşynda Bütindünýä welosiped gününiň BMG-niň Baş Assambleýasy tarapyndan Türkmenistanyň başlangyjy bilen ykrar edilmeginiň, ýurduň sporty ösdürmek we ekologiýa medeniýetini kemala getirmek boýunça tagallalarynyň dünýä bileleşigi tarapyndan ýokary baha berilýändigine şaýatlyk edýändigini aýtdy. Türkiýedäki ýörişe diplomatik işgärler, türkmen diasporasynyň wekilleri, türk metbugatynyň işgärleri we talyplar gatnaşdylar.

Nýu-Delide geçirilen ýörişe diplomatlaryň hatarynda Hindistanda bilim alýan türkmen talyplary hem goşuldy. Bu çäräniň ahyrynda ýaşlar bilen Halkara parahatçylyk we ynanyşmak ýyly hem-de Türkmenistanyň hemişelik bitaraplygynyň 30 ýyllygy bilen bagly wakalar hakynda söhbetdeşlik geçirildi.

Bütindünýä welosiped güni ilkinji gezek 2018-nji ýylda BMG-niň Baş Assambleýasy tarapyndan Türkmenistanyň başlangyjy bilen yglan edildi. Bu baýramçylyk welosipedi elýeterli we ygtybarly ulag serişdesi hökmünde öňe sürmek, daşky gurşawy goramak we ilatyň saglygyny berkitmek maksadyny göz öňünde tutýar.