Türkmenistanyň Prezidenti Serdar Berdimuhamedow «Ak şäherim Aşgabat» atly XXIV köpugurly halkara sergä we maslahata gatnaşyjylara Gutlag hatyny iberdi. «Türkmenistan» gazetinde çap edilen Gutlagda şeýle bellenilýär:

«Hormatly sergä we maslahata gatnaşyjylar!

Sizi Berkarar döwletiň täze eýýamynyň Galkynyşy döwründe ýurdumyzyň paýtagtynyň gazananlaryny dünýä ýaýmak maksady bilen geçirilýän «Ak şäherim Aşgabat» atly XXIV köpugurly halkara serginiň we maslahatyň öz işine başlamagy bilen tüýs ýürekden gutlaýaryn.

Halkara parahatçylyk we ynanyşmak ýylynda Aşgabat şäheriniň gününe bagyşlanyp geçirilýän giň gerimli çäreler aýratyn many-mazmuna eýe bolup, türkmen paýtagtynyň ýaşaýjylarynda Watanymyza bolan buýsanç duýgularyny döredýär. «Ak şäherim Aşgabat» atly XXIV köpugurly halkara sergi we maslahat hem ak mermerli şäherimiziň güni mynasybetli guralýar. Bu çärelerde oňa barýan adamlar Aşgabadyň senagat, medeni we aň-bilim kuwwaty, uly möçberli durmuş-ykdysady serişdeleri hem-de mümkinçilikleri bilen tanyşdyrylar. Ýurdumyzyň halk hojalygyna degişli dürli pudaklaryň täze teklipleri we gazananlary görkeziler. Ak mermerli Aşgabadyň üstünliklerini dünýä jemgyýetçiligine ýaýmak, bu ugurda daşary ýurtly hyzmatdaşlar bilen tejribe alyşmak maksady bilen geçirilýän bu halkara forumyň türkmen paýtagtyny has-da gözelleşdirmek, dünýäniň iň owadan hem-de ýaşamak üçin iň amatly şäherleriniň birine öwürmek boýunça işleriň has-da ilerlemeginde ähmiýetiniň örän uly boljakdygyna ynanýaryn.

Indi köp ýyllar bäri guralýan «Ak şäherim Aşgabat» atly köpugurly halkara sergi Aşgabadyň keşbinde öz beýanyny tapýan özgertmeleriň gerimini aýdyň görkezýär. Ol dürli ulgamlarda we möhüm ugurlarda ýetilen belent sepgitleri ýaýmaga mümkinçilik berýär, halkara hyzmatdaşlygy has-da pugtalandyrýar. Bu forum aşgabatlylarda hem-de paýtagtymyzyň myhmanlarynda ýatdan çykmajak täsirleri galdyrýar.

Türkmen halkynyň Milli Lideri, Türkmenistanyň Halk Maslahatynyň Başlygy, Türkmenistanyň at gazanan arhitektory Gahryman Arkadagymyzyň parasatly başlangyçlary esasynda üstünlikli amala aşyrylan şähergurluşyk-binagärlik maksatnamalarynyň netijesinde Aşgabat dünýäniň durnukly ösýän şäherleriniň birine öwrüldi. Her ýyl geçirilýän «Ak şäherim Aşgabat» atly halkara sergide hödürlenilýän taslamalaryň aglabasy boýunça bu günki gün şäherimizi bezeýän ajaýyp binalaryň ençemesi guruldy. Täze önümçilik, medeni-durmuş, ylym-bilim, saglyk we sport desgalary, döwrebap ýaşaýyş jaýlary diňe bir ak şäherimiziň görküne görk goşmak bilen çäklenmän, eýsem, ilatymyzyň ýaşaýyş-durmuş şertleriniň gowulanmagynda, halkymyza edilýän durmuş hyzmatlarynyň ýokary hilli bolmagynda hem möhüm orna eýe bolýar.

«Aziýanyň merjen şäheri» diýen ykrarnama eýe bolan paýtagtymyzda amala aşyrylýan ägirt uly gurluşyklar türkmenistanlylaryň abadan we bagtyýar durmuşyny üpjün etmäge gönükdirilen döredijilikli, durmuş ugurly döwlet syýasatymyzyň aýdyň netijesidir. Ak mermerli Aşgabat ýurdumyzyň kuwwatynyň has-da artýandygynyň, dowam edýän özgertmeleriň üstünliklere beslenýändiginiň nyşanydyr. Dünýäniň iň gözel we ýaşamak üçin has oňaýly şäherleriniň biri hökmünde Aşgabadyň derejesi barha berkidilip, baş şäherimiziň ösdürilmegi täzeçil şähergurluşyk syýasatymyza esaslanýar.

Hormatly adamlar!

Gadyrly dostlar!

Biz paýtagtymyzyň häzirki döwürde gazanan üstünliklerine, ajaýyp binagärlik keşbine buýsanýarys. Aşgabat ýurdumyzyň iri syýasy-dolandyryş, ylmy, medeni, senagat, söwda we ulag merkezi bolmak bilen, uly ykdysady, ylmy mümkinçiliklere hem eýedir. Şoňa görä-de, 2025-nji ýylyň «Halkara parahatçylyk we ynanyşmak ýyly» diýlip yglan edilmegi we Türkmenistanyň hemişelik Bitaraplygynyň şanly 30 ýyllyk baýramy mynasybetli Aşgabat şäherinde döwrebap edara binalarynyň, ýaşaýyş jaý toplumlarynyň, umumy orta bilim berýän mekdepleriň, çagalar baglarynyň, hassahanalaryň, saglyk öýleriniň, ilata hyzmat edýän desgalaryň, inženerçilik ulgamlarynyň we ýollaryň, şeýle hem ýaşaýjylaryň dynç almagy üçin niýetlenen seýilgähleriň gurluşygy işjeň alnyp barlar. Döwrebap desgalary bilen haýrana goýýan paýtagtymyzyň Garaşsyz, baky Bitarap ýurdumyzyň dolandyryş, senagat, bilim, medeniýet merkezi hökmünde ösmegi ugrunda alyp barýan işlerimizi mundan beýläk hem dowam etdireris.

Hormatly sergä we maslahata gatnaşyjylar!

Gadyrly myhmanlar!

Sizi Halkara parahatçylyk we ynanyşmak ýylynda geçirilýän «Ak şäherim Aşgabat» atly XXIV köpugurly halkara serginiň we maslahatyň öz işine başlamagy bilen ýene-de bir gezek tüýs ýürekden gutlaýaryn. Size berk jan saglyk, maşgala abadançylygyny, asuda we bagtyýar durmuş, berkarar döwletimiziň paýtagtyny has-da ösdürmek ugrunda alyp barýan işleriňizde uly üstünlikleri arzuw edýärin».