Girmek
«Halkara söwda we hyzmatlar» ITSE 2025 sergisi dünýäniň öňdebaryjy kompaniýalarynyň mugt ussatlyk sapaklarynyň geçiriljekdigini yglan etdi. Bu ajaýyp waka 1-nji maýda Türkmenistanyň Söwda-senagat edarasynda geçiriler we gatnaşyjylara «Argus Media Limited», «eBay» hem-de «Messe Frankfurt» ýaly ägirtleriň, şeýle hem beýleki halkara guramalaryň bilermenlerinden gymmatly bilimleri almaga mümkinçilik döreder.
Çäräniň dowamynda hünärmenler ykdysadyýetiň esasy pudaklarynda amaly tejribelerini we bilimlerini paýlaşarlar. Gatnaşyjylar nebithimiýa, elektron söwda, sergi işi, organiki sertifikatlaşdyryş we azyk howpsuzlygy standartlary ýaly ugurlar boýunça halkara bilermenlerinden iň täze maglumatlary alyp bilerler. Alnan bilimler kompaniýalara we hünärmenlere bäsdeşlige ukyplylygyny ýokarlandyrmaga hem-de dünýä bazarynyň häzirki zaman talaplaryny kanagatlandyrmaga kömek eder.
Ussatlyk sapaklarynyň maksatnamasy aşakdaky mowzuklary öz içine alýar:
Halkara söwda we logistika: himiýa we dökünler – Andreý Prohorow («Argus Media», Beýik Britaniýa) nebithimiýa senagatynyň we dökün bazarynyň seljermesini hödürlär, şeýle hem Merkezi Aziýa we Hazar sebitinde kükürt daşamak we logistika meselelerine garalar.
ESG standartlary – Kongkona Sarma («Sidona Green», Beýik Britaniýa) durnukly ösüş ýörelgeleriniň işewürlik üstünligine täsirini beýan eder.
«eBay-da» satuwlar – Fabian Ştahelin (Şweýsariýa) halkara onlaýn platformasynda B2C we B2B satuwy üçin täsirli strategiýalary paýlaşar.
Döredijilikli ykdysadyýeti ösdürmek – Doktor Martin Smit (Beýik Britaniýa) döredijilik pudagynyň ösüşini höweslendirmek üçin häzirki tendensiýalary we gurallary ara alyp maslahatlaşar.
Sergilerde üstünlik – Ýurgen Wers («Messe Frankfurt», Germaniýa) işewürlik maksatlaryna ýetmek üçin halkara sergilere gatnaşmakdan nädip iň ýokary derejede netijeli peýdalanmalydygy barada gürrüň berer.
Organiki sertifikatlaşdyryş – Sanžar Sultankulow (Gyrgyzystan) brending meselelerini we organiki önümçilik pudagynyň esasy bazar ösüşini beýan eder.
GLOBALG.A.P. sertifikatlary – Edita Strazdina (Latwiýa) oba hojalyk pudagynda eksport standartlaryny tanyşdyrar.
Organiki dokma önümleri – Katarina Şaus (Germaniýa) GOTS standartynyň mümkinçilikleri we peýdalary barada gürrüň berer.
Başlangyç kompaniýalar (startaplar) üçin maýa goýumlar: bu nähili işleýär – Ženýa Rozinskiý (ABŞ) täze açylan kompaniýalar üçin «perişde maýa goýumlaryny» çekmäge bagyşlanan ussatlyk sapagyny geçirer.
Ussatlyk sapaklaryna nebitgaz toplumynyň, söwda, önümçilik, oba hojalygy we ykdysadyýetiň beýleki gyzyklanma bildirýän pudaklarynyň hünärmenleri çagyrylýar. Işewürligiňizi giňeltmek bolsun, halkara sertifikatyny almak ýa-da global ösüş meýillerine eýermek bolsun, haýsy maksat bilen gatnaşýandygyňyza garamazdan, bu sessiýalar gymmatly bilimleri we peýdaly maslahatlary berer.
Seminarlara gatnaşmak mugt, ýöne guramaçylar ýerleriň sanynyň çäklidigi sebäpli deslapky hasaba alynmagyň zerurlygyna ünsi çekýärler.
Hasaba alynmak üçin maglumatlar:
- web-saýt: itse.turkmenexpo.com;
- elektron poçta: itse@turkmenexpo.com.
Şeýle-de okaň: