Girmek
3-nji aprelde Wenada Merkezi Aziýa döwletleriniň ilçileri ÝHHG-niň Baş sekretary bilen duşuşdylar. Duşuşyk Türkmenistanyň başlangyjy bilen geçirildi.
Türkmenistanyň DIM-iniň habar bermegine görä, söhbetdeşler üç ölçegde ÝHHG-niň giň gün tertibini we Merkezi Aziýanyň Helsinki dekalogyny ilerletmekdäki ornuny ara alyp maslahatlaşdylar.
Duşuşygyň gün tertibine sebit howpsuzlygy, howanyň üýtgemegi, ulag we söwda aragatnaşygy, adam hukuklary, hukugyň hökmürowanlygy, demokratik institutlar bilen bagly meseleler girizildi.
Türkmenistanyň 2025-nji ýyly «Halkara parahatçylyk we ynanyşmak ýyly» diýip yglan etmek baradaky başlangyjy barada giňişleýin durlup geçildi. Bu başlangyç 2024-nji ýylda BMG-niň Baş Assambleýasynyň degişli Kararnamasy bilen ykrar edilip, halkara giňişlikde giň goldawa eýe boldy. Şeýle-de 2025-nji ýylyň dowamynda diplomatiýa, dialog, medeni özara gatnaşyklar, söwda we ykdysady hyzmatdaşlyk arkaly halklaryň arasynda ynanyşmagy berkitmäge gönükdirilen köp sanly çäreleriň geçiriljekdigi bellenildi.