26-njy fewralda Pekin şäherindäki «Green Rivers Manor» myhmanhanasynyň Medeniýet merkezinde Türkmenistanyň Prezidentiniň «Magtymguly – dünýäniň akyldary» atly kitabynyň tanyşdyrylyş dabarasy hem-de Türkmenistanyň hemişelik Bitaraplygynyň 30 ýyllygy giňden bellenilýän Halkara parahatçylyk we ynanyşmak ýyly mynasybetli dabaraly kabul edişlik geçirildi. Bu barada Türkmenistanyň DIM-iniň resmi saýtynda habar berildi.

Çärä Türkmenistanyň Hytaýdaky Adatdan daşary we Doly ygtyýarly ilçisi P.Durdyýew we ilçihanasynyň diplomatlary, Hytaýyň Atçylyk assosiasiýasynyň Baş sekretary, Türkmenistanyň at gazanan atşynasy hem-de «Magtymguly Pyragynyň 300 ýyllygyna» atly ýubileý medalynyň eýesi Ýue Gaofeň, Ninsýa uniwersitetiniň prorektory we professory, «Magtymguly Pyragynyň 300 ýyllygyna» atly ýubileý medalynyň eýesi Çžao Sýaoszýa, Demirgazyk-günbatar uniwersitetiniň (Sian ş.) mugallymy S.Maşrykow, Medeniýet merkeziniň ýolbaşçylary we işgärleri, şeýle-de Pekin şäherinde bilim alýan türkmen talyplary gatnaşdylar.

Dabara gatnaşyjylar öz çykyşlarynda Türkmenistanyň Prezidentiniň «Magtymguly – dünýäniň akyldary» atly eseriniň möhüm ähmiýetini nygtamak bilen, beýik şahyr Magtymguly Pyragynyň döredijiliginiň Türkmenistanyň hemişelik Bitaraplyk derejesine eýe bolmagynyň 30 ýyllygynyň, Halkara parahatçylyk we ynanyşmak ýylynyň dabaralanýan döwründe aýratyn mana eýe bolýandygyny bellediler.

Magtymgulynyň meşhur «Türkmeniň» goşgusynyň türkmen talyplary tarapyndan türkmen we hytaý dilinde çeper okalmagy çärä aýratyn öwüşgin berdi.

Çäräniň dowamynda Türkmenistanyň Hytaýdaky ilçihanasy tarapyndan hytaýly hyzmatdaşlara we türkmen talyplaryna Türkmenistanyň Prezidentiniň «Magtymguly – dünýäniň akyldary» atly kitaby we Magtymguly Pyragynyň hytaý diline terjime edilen goşgular ýygyndysy sowgat berildi.