Ozal habar berşimiz ýaly, şu gün Türkmenistanyň Prezidenti Serdar Berdimuhamedow BMG-niň Baş sekretarynyň orunbasary hanym Rabab Fatimany kabul etdi.

Duşuşykda türkmen döwletiniň Baştutany hanym Rabab Fatimany mähirli mübärekläp, BMG-niň Baş sekretaryna iň gowy arzuwlaryny beýan etdi hem-de myhmanyň saparynyň çäklerinde şu ýylyň awgust aýynda BMG-niň deňze çykalgasy bolmadyk ösüp barýan döwletler boýunça üçünji maslahatyny geçirmek maksady bilen gatnaşjak brifinginiň we boljak duşuşyklaryň üstünlikli geçmegini arzuw etdi.

Prezident Serdar Berdimuhamedow Türkmenistanda häzirki döwürde ulag we kommunikasiýalar ulgamyny ösdürmäge möhüm ähmiýet berilýändigini belläp, ýurduň geografik taýdan amatly ýerleşmeginiň ulag-logistika ulgamyny ösdürmäge berk esas bolup durýandygyny we şoňa görä-de köpugurly we sebit ähmiýetli Demirgazyk – Günorta, Gündogar – Günbatar halkara ulag geçelgelerini döretmek boýunça işleriň geçirilýändigini aýtdy. Bu ugurda alnyp barylýan yzygiderli işleriň çäklerinde Türkmenistanyň başlangyjy boýunça BMG-niň Baş Assambleýasynyň durnukly ulag boýunça kabul eden dört Kararnamasynyň ähmiýeti bellenildi.

– Şeýle hem 2022-nji ýylda deňze çykalgasy bolmadyk ösüp barýan döwletleriň ulag ministrleriniň, halkara hem-de sebitara guramalarynyň gatnaşmagynda «Awaza» milli syýahatçylyk zolagynda halkara maslahaty geçirildi. Onuň dowamynda durnukly ulag-üstaşyr geçelgelerini döretmek ýaly möhüm meseleler ara alnyp maslahatlaşyldy – diýip, Türkmenistanyň döwlet Baştutany aýtdy. Bu barada «Watan» habarlar gepleşiginde habar berildi.

Şeýle-de okaň:

• Türkmenistanyň Prezidenti BMG-niň Baş sekretarynyň orunbasaryny kabul etdi