Girmek
Ýaponiýanyň Premýer-ministriniň ýörite geňeşçisi Akihisa Nagaşima 29-njy ýanwardan 8-nji fewrala çenli Merkezi Aziýa döwletlerinde saparda bolar.
Ýaponiýanyň Hökümetiniň çarşenbe güni beren resmi habaryna görä, jenap Akihisa Nagaşima saparynyň dowamynda Merkezi Aziýa döwletleriniň ýokary wezipeli ýolbaşçylary bilen duşuşyklary geçirer. Olarda «Merkezi Aziýa + Ýaponiýa» dialogyna gatnaşyjy ýurtlaryň sammitine taýýarlyk görmek hem-de Ýaponiýa bilen sebitiň ýurtlarynyň arasyndaky ikitaraplaýyn hyzmatdaşlygy pugtalandyrmak bilen bagly meseleler ara alnyp maslahatlaşylar.
«Akihisa Nagaşimanyň Gazagystana, Täjigistana, Gyrgyzystana, Türkmenistana we Özbegistana amala aşyrjak sapary Ýaponiýanyň Merkezi Aziýa döwletleri bilen gatnaşyklara uly üns berýändigini görkezýär» diýlip, habarda bellenilýär.