Türkmenistanda ylmy işgärleri taýýarlamak hakynda Düzgünnama laýyklykda, ýylyň-ýylyna aspirantura, doktorantura kabul etmek we alymlyk derejelerine dalaşgärlige hasaba almak işleri işjeň ýagdaýda alnyp barylýar. Bu barada «Türkmenistan» gazetinde çap edilen söhbetdeşlikde bellenilýär.

Aspiranturany, doktoranturany açmagyň hem-de olaryň işiniň Tertibine laýyklykda, degişli ministrlikleriň we pudaklaýyn dolandyryş edaralarynyň teklipnamalarynyň esasynda, öň hereket edýän aspiranturalara, doktoranturalara täze hünärler girizilýär. Şu ýyl Türkmenistanyň Ylymlar akademiýasynyň Halkara ylmy-tehnologiýa parkynyň doktoranturasyna 05.13.18 — matematiki modelirleme, san usullary we programma toplumlary hünäri, Halkara fiziologiýa ylmy-kliniki merkeziniň doktoranturasyna 14.03.03 — patologik fiziologiýa hünäri girizildi.

Habarda bellenilişi ýaly, Türkmenistan boýunça hereket edýän aspiranturalarda jemi 191 hünär boýunça ýokary hünär derejeli ylmy işgärler taýýarlanylýar, doktoranturalarda jemi 89 hünär hereket edýär. Şu ýyl ylmyň ugurlary boýunça jemi 114 adam: aspirantura 22 adam, doktorantura 2 alym kabul ediler hem-de alymlyk derejelerine dalaşgärlige 81 adam, ylymlaryň doktory alymlyk derejesine dalaşgärlige 9 alym hasaba alnar. Olaryň ylym ugurlarynyň hatarynda fizika-matematika, himiýa, biologiýa, tehniki, oba hojalyk ylymlary, taryh ylymlary we arheologiýa, ykdysady, filologiýa, hukuk, pedagogika, lukmançylyk, sungaty öwreniş ylymlary, psihologiýa, milli howpsuzlyk, syýasy ylymlar, medeniýeti öwreniş ylymlary, şeýle-de ýer baradaky ylymlar bar.

Şunuň bilen baglylykda, şu ýyl aspirantura, doktorantura kabul etmek we alymlyk derejelerine dalaşgärlige hasaba almak jemi 63 hünär boýunça yglan edildi diýlip, bellenilýär.