Şu gün Türkmenistanyň Prezidenti, Türkmenistanyň Ýaragly Güýçleriniň Belent Serkerdebaşysy goşun generaly Serdar Berdimuhamedow Döwlet howpsuzlyk geňeşiniň giňişleýin göçme mejlisini geçirdi. «Watan» habarlar gepleşiginde habar berlişi ýaly, mejlisde ýurduň harby we hukuk goraýjy edaralary tarapyndan 2024-nji ýylda alnyp barlan işleriň jemleri jemlenildi hem-de şu ýylda bu düzümleriň öňünde durýan esasy wezipeler kesgitlenildi.

Mejlisde, ilki bilen, Döwlet howpsuzlyk geňeşiniň sekretary, goranmak ministri B.Gündogdyýew geçen ýyl ýurduň Ýaragly Güýçlerini ösdürmegiň degişli maksatnamasyny durmuşa geçirmek, sanly ulgamy giňden ornaşdyrmak, harby gullukçylaryň hünär derejesini ýokarlandyrmak hem-de ýaşaýyş-durmuş derejesini gowulandyrmak boýunça görlen çäreler barada hasabat berdi. Şeýle hem hasabatda çagyryş boýunça harby gullugy geçýän harby gullukçylary gullukdan boşatmak we Türkmenistanyň raýatlaryny harby gulluga çagyrmak boýunça alnyp barlan işler, Watan goragçylarynyň gününe taýýarlyk görlüşi barada-da aýdyldy.

Prezident Serdar Berdimuhamedow hasabaty diňläp, 2024-nji ýylda Türkmenistanyň Ýaragly Güýçleriniň kuwwatyny berkitmäge gönükdirilen dürli çäreler toplumynyň yzygiderli geçirilendigini aýtdy.

— Ýaragly Güýçleriň maddy-enjamlaýyn binýadyny pugtalandyrmak hem-de ýurdumyzyň goranmak ukybyny ýokarlandyrmak ugrunda degişli işler alnyp baryldy — diýip, döwlet Baştutany belledi hem-de 2025-nji ýylda ýurduň Ýaragly Güýçlerini kämilleşdirmek we ösdürmek boýunça işleriň dowam etdiriljekdigini aýtdy.

Şeýle-de Ýaragly Güýçleri döwrebap harby tehnikalar we enjamlar bilen üpjün etmek, häzirki döwrüň talaplaryna laýyklykda harby ulgamda innowasion tehnologiýalardan baş çykarýan harby hünärmenleri taýýarlamak işleri ileri tutulýan wezipeleriň hatarynda kesgitlenildi.

Türkmenistanyň Prezidenti Döwlet howpsuzlyk geňeşiniň sekretary, goranmak ministrine Ýaragly Güýçleriň harby bölümleriniň maddy-enjamlaýyn binýadyny mundan beýläk-de pugtalandyrmak hem-de harby gullukçylaryň ýaşaýyş-durmuş şertlerini has-da gowulandyrmak boýunça meseleleri gözegçilikde saklamagy tabşyrdy.

Soňra harby we hukuk goraýjy edaralaryň ýolbaşçylary öz gözegçilik edýän düzümleri tarapyndan 2024-nji ýylda ýerine ýetirilen işleriň netijeleri, ozal berlen tabşyryklaryň berjaý edilişi barada hasabatlary berdiler.

Döwlet Baştutany hasabatlary diňläp, öňde durýan wezipeler bilen baglylykda, harby we hukuk goraýjy edaralaryň ýolbaşçylaryna anyk tabşyryklarydyr görkezmeleri berdi.

Türkmenistanyň Prezidenti, Türkmenistanyň Ýaragly Güýçleriniň Belent Serkerdebaşysy goşun generaly Serdar Berdimuhamedow mejlisiň ahyrynda oňa gatnaşyjylara ýüzlenip, goranyş häsiýetli Harby doktrinanyň talaplaryna laýyklykda, Garaşsyz, hemişelik Bitarap Türkmenistanyň harby howpsuzlygyny we bitewüligini ýokary derejede üpjün etmek, ýurduň goranmak ukybyny berkitmek, şeýle hem Watan goragçylarynyň we olaryň maşgala agzalarynyň ýaşaýyş-durmuş şertlerini has-da ýokarlandyrmak boýunça maksatnamalaýyn işleriň durmuşa geçirilýändigini, bu işleriň mundan beýläk hem dowam etdiriljekdigini belledi.

Şeýle-de döwlet Baştutany ýurduň harby we hukuk goraýjy edaralarynyň ähli harby gullukçylaryny we işgärlerini ýetip gelýän Watan goragçylarynyň güni bilen tüýs ýürekden gutlady.