Girmek
«Türkmenhimiýa» döwlet konserniniň önümçilik düzümleriniň öňdebaryjylarynyň hatarynda tanalýan Türkmenbaşy etrabynyň Guwlymaýak şäherçesindäki «Guwlyduz» kärhanasynda geçen ýyl jemi gazylyp alnan duzuň umumy möçberi 97,6 müň tonna golaýlady. Bu görkeziji bellenilen meýilnamanyň 2 müň tonnadan hem gowrak artygy bilen berjaý edilendigini aňladýar diýlip, türkmen metbugatynda habar berildi.
Habarda bellenilişi ýaly, kärhananyň taýýarlaýan tehniki duzlary ýurduň ýangyç-energetika toplumynda harytlyk görnüşine getirilýän nebit önümleriniň düzümini dünýä hil ülňülerine laýyk derejede arassalamakda, dokma pudagynda taýýarlanýan ýüplükleriň reňkiniň solmazlygyny gazanmakda, ýyladyş ulgamlarynyň işini kadaly ýola goýmakda we beýleki köp sanly ugurlarda giňden peýdalanylýar.
Himiýa pudagynyň bu önümçilik düzümi nahar duzuny sebitde birinji, dünýäde dördünji bolup ýola goýan kärhanadyr.
Hasabat ýylynda nahar duzuny ýörite gaplara gaplamak baradaky tabşyryk 102,4 göterim berjaý edildi. 2024-nji ýyl bu ýerde taýýarlanan däneli duzuň möçberem bellenilen meýilnamadan 4 müň tonna artyk boldy diýlip, habarda bellenilýär.