Girmek
Türkmenistanyň çägi arkaly daşalýan halkara ýükleriň möçberi yzygiderli artýar. Has takygy, 2024-nji ýylda «Demirgazyk — Günorta» halkara ulag geçelgesiniň Eýranyň, Türkmenistanyň, Gazagystanyň hem-de Russiýanyň çäginden geçýän Gündogar şahasynyň ugry boýunça daşalan ýükler 2023-nji ýyldakydan 3 esse töweregi artdy. Bu barada Eýran Yslam Respublikasynyň Russiýa Federasiýasyndaky ilçisi Kazem Jalaliniň sözlerine salgylanyp, «TASS» ýazýar.
«Deslapky maglumatlara görä, 2024-nji ýylda «Demirgazyk — Günorta» halkara ulag geçelgesiniň Eýranyň, Russiýanyň, Gazagystanyň we Türkmenistanyň çägi arkaly geçýän Gündogar şahasy boýunça 1,8 — 2 million tonna aralygynda ýük daşaldy. Bu geçelgäniň ýyllyk ýük geçirijilik mümkinçiligi bolsa 15 million tonna barabar» diýip, eýranly diplomat belleýär.
Ýeri gelende bellesek, 2023-nji ýylda degişli ugur boýunça daşalan ýükleriň möçberi 650 müň tonnadan gowrak bolupdy.
Kazem Jalaliniň aýtmagyna görä, «Demirgazyk — Günorta» halkara ulag geçelgesiniň Hazaryň üstünden geçýän Gündogar şahasy arkaly daşalýan ýükleriň möçberini has-da artdyrmak üçin Hazar deňzindäki gämileriň sanyny artdyrmak zerurdyr.