Girmek
Şu gün Türkmenistanyň daşary işler ministri Raşid Meredow Belarus Respublikasynyň Türkmenistanda täze bellenilen Adatdan daşary we Doly ygtyýarly ilçisi Stanislaw Çepurnoý bilen duşuşdy. Ilçi özüniň ynanç hatlarynyň nusgalaryny gowşurdy.
Türkmenistanyň DIM-iniň metbugat gullugynyň habar bermegine görä, ministr R.Meredow ilçini jogapkärli wezipä bellenilmegi bilen gutlady we türkmen tarapynyň onuň diplomatik işinde zerur bolan goldawy we ýardamlary bermäge taýýardygyny beýan etdi.
Duşuşygyň barşynda taraplar syýasy-diplomatik, söwda-ykdysady, medeni-ynsanperwer ugurlardaky ikitaraplaýyn gatnaşyklary ösdürmegiň geljegini ara alyp maslahatlaşdylar. Türkmenistan bilen Belarus Respublikasynyň arasyndaky gatnaşyklaryň birek-birege hormat goýmak, deňhukuklylyk we özara bähbitli hyzmatdaşlyk ýörelgeleri esasynda ösdürilýändigi bellenildi.
Iki ýurduň sebitleýin we halkara düzümleriň çäklerindäki gatnaşyklaryna aýratyn üns berildi. Hususan-da, taraplar BMG-niň çäginde başlangyçlary özara goldamagy dowam etmäge taýýardyklaryny mälim etdiler diýlip, çeşmede bellenilýär.