Girmek
Türkmenistanda bellenilen Nebitgaz senagaty we geologiýa işgärleriniň güni mynasybetli, «Türkmennebit» döwlet konserniniň «Nebitgazdüýpliabatlaýyş» trestine täze «LG C360» kysymly maýyşgak nasos kompressor turbaly tehnikalar toplumynyň 3-si we awtobuslar gelip gowuşdy. Olar Hytaý Halk Respublikasyndan satyn alyndy.
«Türkmenistan» gazetinde berilýän habara görä, konserniň zähmet toparlary has kämil ýöriteleşdirilen tehnikalar toplumyny we awtobuslary ýokary ruhubelentlikde kabul etdiler.
Habar berlişi ýaly, Hytaýdan gelip gowşan bu tehnikalaryň düzümindäki köpugurly tehnikalar önüm bermesini kemelden ýa-da bütinleý bes eden guýularda düýpli abatlaýyş işlerini ýokary hilli amala aşyrmaga mümkinçilik berýär.
Olaryň kömegi bilen wagtlaýyn hereketsiz duran we guýynyň içinde gaýry zatlaryň baslygyp galmagy netijesinde emele gelen çylşyrymly bökdençlikleri aradan aýyrmak işi ýerine ýetirilýär.
Şonuň ýaly-da, düýpli abatlaýşa garaşýan guýulary öz wagtynda dikeldip, ulanyşa tabşyrmak üstünlikli ýola goýulýar. Bu tehnikalar toplumynyň ýany bilen sorujy enjamlar, awtoçelekler, kiçi elektrik desgalary, ähli amatlyklary bolan medeni öýjagazlar hem-de ätiýaçlyk şaýlar gelip gowuşdy diýlip, habarda bellenilýär.