Türkmenistanyň kitaphanalary ilkinji gezek Moskwa şäherinde geçirilen «Çagalar edebiýatynyň dilinde: çagalar edebiýaty we okamak babatda hyzmatdaşlyk» atly GDA ýurtlarynyň çagalar we ýaşlar kitaplarynyň II halkara kitap forumyna gatnaşdy. Bu barada «Türkmenistan: Altyn asyr» internet neşiri habar berýär.

Türkmen wekiliýetiniň düzüminde Türkmenistanyň Döwlet medeniýet merkeziniň Döwlet kitaphanasynyň hem-de B.Amanow adyndaky Döwlet çagalar kitaphanasynyň wekilleri foruma gatnaşdylar.

Forum Russiýanyň Döwlet çagalar kitaphanasy tarapyndan GDA-nyň Ynsanperwer hyzmatdaşlyk boýunça döwletara gaznasynyň hem-de «Okyjyny ösdürmek» atly çagalary kitaba höweslendirmek boýunça medeni we bilim işgärleriniň birleşigininň goldaw bermeginde guraldy.

Çärä 8 ýurtdan çagalar edebiýaty we beýleki ugurdaş hünärmenler gatnaşdylar. Olar çagalaryň we ýetginjekleriň has köp kitap okamagyny höweslendirmek we ösdürmek üçin öz ýurtlarynda geçirilen işleriň netijeleri barada maglumat berdiler hem-de bu ugurdaky tejribelerini paýlaşdylar.

Bu çärä GDA ýurtlaryndan döwlet we jemgyýetçilik kitaphanalaryň hünärmenleri, ýazyjylar, şeýle hem çagalar edebiýaty we kitaplar boýunça hünärmenler gatnaşdylar. Forumyň maksatnamasy tematiki «tegelek stollary», ýazyjylar we suratkeşler bilen duşuşyklary hem-de sergileri öz içine aldy.