Türkmen döwlet ykdysadyýet we dolandyryş institutynda «Türkmenistan – Bitaraplygyň mekany» atly giň gerimli «breýn-ring» aň-paýhas bäsleşigi geçirildi. Bu bäsleşige ýurduň birnäçe öňdebaryjy ýokary bilim edaralarynyň talyplary gatnaşdy.

Bu çäre Halkara bitaraplyk güni we Türkmenistanyň hemişelik bitaraplygynyň 29 ýyllygy mynasybetli geçirilýär. Bäsleşige Türkmen döwlet ykdysadyýet we dolandyryş institutynyň, Türkmen döwlet maliýe institutynyň, Türkmenistanyň Daşary işler ministrliginiň Halkara gatnaşyklar institutynyň we Türkmenistanyň Halkara ynsanperwer ylymlary we ösüş uniwersitetiniň toparlary gatnaşdy.

Talyplar Türkmenistanyň bitaraplyk, parahatçylyk söýüjilik we özara bähbitli hyzmatdaşlyk ýörelgelerine esaslanýan daşary syýasy strategiýasy bilen baglanyşykly soraglara jogap bermekde bäsleşdiler.

Breýn-ring bäsleşigiň jemlerine görä, birinji orny Türkmen döwlet ykdysadyýet we dolandyryş institutynyň topary, ikinji orny Türkmenistanyň Daşary işler ministrliginiň Halkara gatnaşyklar institutynyň topary, üçünji orny bolsa Türkmenistanyň Halkara ynsanperwer ylymlary we ösüş uniwersitetiniň topary eýeledi.

Bäsleşigiň guramaçylarynyň belleýşi ýaly, şeýle çäreleriň guralmagy diňe bir iň zehinli ýaşlary ýüze çykarmak bilen çäklenmän, eýsem watançylyk duýgusyny ösdürmäge, talyp ýaşlaryň döwletimiziň daşary syýasy ugry baradaky düşünjesiniň ösdürilmegine hem ýardam edýär.