Türkmenistanyň Daşky gurşawy goramak hem-de Oba hojalygy ministrlikleriniň işgärleri, şeýle hem welaýat häkimlikleriniň oba hojalygy we daşky gurşawy goramak bölümleriniň hünärmenleri Türkiýede okuw saparynda boldular.

Bu barada «Türkmenistan: Altyn asyr» internet neşiri habar berýär.

Bu sapar «Merkezi Aziýada we Türkiýede gurakçylyk we şorlaşma bilen baglanyşykly oba hojalygynyň önümçilik meýdanlarynda tebigy baýlyklary toplumlaýyn dolandyrmagy giňeltmek üçin» sebitleýin taslamanyň hem-de beýleki birnäçe maksatnamalaryň çäginde amala aşyryldy.

Saparyň dowamynda Türkiýäniň Daşky gurşaw, şäherleşme we howanyň üýtgemegi ministrliginde duşuşyk geçirildi. Onda çölleşmäge garşy göreşmek, ýerden netijeli peýdalanmak tejribesini girizmek we suw baýlyklaryny dolandyrmak meselelerine aýratyn üns berildi.

Taraplar umumy daşky gurşaw meselelerini çözmäge we sebitiň durnukly ösüşini üpjün etmäge gönükdirilen hyzmatdaşlyga özara gyzyklanma bildirdiler.

Türkmen wekiliýeti çölleşmäge garşy göreş we şorlaşan ýerleri dikeltmek boýunça başlangyçlaryň durmuşa geçirilýän ýerlerine hem aýlanyp gördi.

Ýedi günüň dowamynda wekiliýetiň agzalary çöl meýdanlaryny tokaýlaşdyrmak, şeýle-de şäher we milli seýilgähleri doldurmak üçin nahallaryň ösdürilip ýetişdirilýän birnäçe ýyladyşhanalaryna baryp gördüler.

Mundan başga-da, saparyň maksatnamasy Torku söwda brendiniň önümçilik toplumyna baryp görmegi, tebigy baýlyklary durnukly dolandyrmagyň ajaýyp nusgasy bolan Altynapa suw howdanynyň töweregindäki tokaý meýdançasyna aýlanyp görmegi hem öz içine aldy.

Çölleşmäge garşy göreşmek boýunça amalay sapaklar bolsa Agýatan meýdançasynda geçirildi.