Türkmenistanyň Saglygy goraýyş we derman senagaty ministriniň orunbasary, Döwlet sanitariýa we epidemiologiýa gullugynyň başlygy Azat Öwezowyň ýolbaşçylygyndaky türkmen wekiliýeti BSGG-niň Ýewropa sebitleýin bölüminiň müdiri doktor Hans Kluge bilen duşuşdy. Duşuşyk türkmen wekiliýetiniň BSGG-niň Ýewropa sebit komitetiniň 73-nji mejlisine gatnaşmagynyň çäklerinde geçirildi.

Türkmenistanyň Gazagystandaky ilçihanasynyň metbugat gullugynyň habaryna görä, duşuşygyň dowamynda ministriň orunbasary BSGG-niň Ýewropa sebit bölüminiň müdirine bu ugurda halkara giňişlikde Türkmenistanyň Hökümetiniň saglygy goraýyş babatda öňe süren iň täze başlangyçlaryny we tekliplerini hödürledi. Şeýle hem Türkmenistanyň BSGG bilen hyzmatdaşlygy mundan beýläk-de ösdürmäge we berkitmäge üns berýändigi bellenildi.

Duşuşykda halkara saglygy goraýyş pudagyndaky özara gatnaşyklar we häzirki meseleler ara alnyp maslahatlaşyldy. Iki tarap hem hyzmatdaşlygyň ýokary derejesini bellediler we saglygy goraýyş pudagyndaky häzirki meseleler barada pikir alyşdylar.

Çäräniň çäginde türkmen wekiliýetiniň ýolbaşçysy «BSGG-niň Ýewropa sebitinde strategik dolandyryş we liderlik» atly mejlisde çykyş etdi. Öz çykyşynda Wise-premýer Türkmenistanda ýokanç däl kesellere garşy göreşmek, şeýle hem lukmançylyk infrastrukturasyny ösdürmek arkaly ähli raýatlara ýokary hilli lukmançylyk kömegini deň derejede üpjün etmek barada giňişleýin we täsirli öňüni alyş çäreleri barada maglumat berdi.

Ministriň orunbasary geljek ýyl Türkmenistanda dürli saglygy goraýyş maksatly çäreleri geçirmek meýilnamalary barada hem durup geçdi.